Засгийн газраас өргөн барьсан "Газрын тухай хуулийн" төслийг эсэргүүцэгчид олон бий. Тухайлбал, энэ сарын 11-нд цахим ертөнцийнхэн буюу "фэйсбүүк" “ДМ” буюу Дэлхийн монголчууд нэгдлээс уг хуулийг эсэргүүцэн жагсаал хийсэн билээ. Тэдний жагсах болсон шалтгаан нь Газрын тухай шинэчилсэн багц хууль нь Монгол Улсын тусгаар тогтнол, ард түмний амьдралын арга барил, иргэний эрх ашгийг зөрчиж байгаагийн улмаас энэ хуулийн төслийг дэмжихгүй хэмээн ийн жагссан юм.

2013 оны мэдээгээр 2008 оноос хойш Монгол Улсын иргэнд 0,07 га газрыг үнэгүй олгох явцад гэр бүлийн хэрэгцээний шаардлагад нийцэх, тохирсон газар хүрэлцээгүйн улмаас ердөө 255 мянган иргэд газар өмчилж авсан аж. Газрын тухай хууль Монголын газар шороог зарж, арилжаалж, барьцаалж болж байгаа ч эцсийн үр дүндээ Монгол Улсын нэгдмэл газар нутгийн байдал алдагдах, баялаг ихтэй хэсэг нь хуваагдах аюултай.

Энэхүү хуулийн хамгийн их шүүмжлэл дагуулж байгаа асуудал нь гадны иргэдэд газар өмчлүүлэх гэж байна гэсэн мэдээлэл юм.

Мөн дээрх хуулийг УИХ дахь бие даагчдын зөвлөл, МАН-ын бүлгийн зарим гишүүд эсэргүүцэж байгаа юм. Өчигдөр АН-ын бүлгээс энэ долоо хоногт хэлэлцэх Газрын тухай хуулийн талаар АН-ын бүлгийн дарга Д.Эрдэнэбат, Газрын тухай хуулийн төслийн ажлын хэсгийн ахлагч Б.Гарамгайбаатар, УИХ-ын гишүүн С.Одонтуяа нар мэдээлэл хийлээ.

УИХ-ын гишүүн Б.Гарамгайбаатар: "Сүүлийн үед газрыг гадны иргэнд 60 буюу түүнээс дээш жилээр өмчлүүлэхээр болсон гэх яриа гарсан. Энэ нь худал мэдээлэл бөгөөд гадаадын иргэнд урт хугацаагаар газар эзэмшүүлэх заалт тус хуулинд ороогүй. Харин Газрын тухай хуулийн 44.4-т Монгол улсад байнга /183 хоногоос дээш хугацаагаар/ оршин суугаа гадаадын иргэн, харьяалалгүй хүнд газрыг зөвхөн гэр бүлийн хамтын хэрэгцээний зориулалтаар ашиглуулна гэж заасан. Ашиглуулах газрын хэмжээ нь 0.1-0.05 байна гэж хуульд тусгасан" гэлээ.

Мөн гадны иргэдэд ашиглах эрх өгч байгаа нь өмчлүүлнэ гэж ойлгоод байх шиг байна. Эзэмших гэдгийг энэ хуулинд ямар байдлаар оруулж байгаа вэ гэхээр зөвхөн төрийн төсөвт байгууллагууд эзэмших ёстой гэж бид үзэж байгаа юм. Тэгэхээр өөр хүн эзэмших эрхгүй гэсэн үг. Ашиглах гэдэг нь дотроо 5,6 хэсэгтэй. Нэгд Монгол Улсын иргэн газар ашиглаж болно. Ашиглахдаа “тодорхой үйл ажиллагаа явуулах зураг төсөлтэй  гэрээг аймаг, нийслэлийн Засаг дарга хийж, ашиглана” гэсэн заалт байгаа. Гэрээн дээр нөхцөл шаардлагууд тодорхой тусгагдана. Мөн “Монгол Улсын иргэн газрыг оршин суух зориулалтаар ашиглаж болно” гэсэн заалт байгаа.

Түүнчлэн Монгол Улсын хуулийн этгээд газар ашиглаж болно. Зориулалтын дагуу биржээр дамжуулж гэрээ байгуулаад ашиглаж болно гэсэн үг. Хэрвээ зориулалтын бусаар ашиглавал төр шууд хураана. Мөн Гадаадын иргэн, харьяалалгүй хүмүүс Монгол Улсад оршин суух хугацаандаа  газар ашиглах боломжийг бүрдүүлж байгаа юм. Газрын биржээр дамжуулж аваад тэндээ зөвхөн оршин суух зорилгоор ашигла гэсэн заалт байгаа.  Дараагийх нь “Гадаадын хуулийн этгээд тодорхой үйл ажиллагаа явуулах эрхтэйгээр мөн ашиглаж болно” гэсэн заалт байгаа юм. Тухайн ашиглах газар дээр зураг төсөл нь байх юм.  Гадаадын хөрөнгө оруулалтай аж ахуйн нэгж мөн газар ашиглаж болно. Гэрээнд заагдсан зориулалтаар л ашиглана. Өмчлөх, эзэмших эрх байхгүй. Тодорхой хугацаатай. Энэ бүгдийг газрын биржээр дамжуулж ашиглах юм. Монголын болоод хамтарсан аж ахуйн нэгж мөн адил. Одоо мөрдөгдөж байгаа хуулинд эдгээр заалтууд бүгд байгаа юм. Ганцхан үүнийг эсэргээр нь тайлбарлаж, иргэдэд буруу ойлгуулаад байна" хэмээн мэдэгдсэн юм.

АН-ын бүлгийн дарга Д.Эрдэнэбат: "Газрыг гадаадны иргэнд ашиглуулах гэснийг өмчлүүлэх гэж буруу ойлгосон байна гэв. Ер нь өмчлүүлэх, ашиглуулах, эзэмшүүлэхээ ялгахгүй байж улс төр хийж хүмүүст худал мэдээлэл цацаж болохгүй" гэв.

Түүнчлэн УИХ-ын гишүүн Ё.Отгонбаяр "газрыг гадны иргэнд өмчлүүлэх гэж байна" хэмээн твиттерээрээ жиргэж, олон нийтийг жагсаал цуглаанд уриалан дуудсан байна. Энэ нь УИХ-ын гишүүний ёс зүйд нийцэхгүй бөгөөд худал мэдээллээр олон нийтийн санаа бодлыг үймүүлж байгаа тул холбогдох хуулийн байгууллагууд нь анхааралдаа авахыг тэрбээр мөн сануулж байна хэмээн өөрийн байр сууриа илэрхийлсэн юм.

Х.Даваа