УИХ-ын дарга З.Энхболд  АН-ын дарга болсоноос хойш  намынхаа удирдах бүрэлдэхүүнийг  шинэчлэх алхамаа  нэлээд шаргуу хийж эхлэв бололтой. 

Тэрбээр намын Ерөнхий нарийн бичгийн даргаа юун түрүүнд өөрчлөх зорилго тавьсан бөгөөд  үүнийгээ  хэрэгжүүлэх  аятайхан боломжийг харж байжээ. Намын Ерөнхий нарийн бичгийн дарга гэдэг бол намынхаа  хар бор  бүх юмыг амжуулдаг жинхэнэ “ажлын морь” .  Олон фракциудын ашиг сонирхолын огтлолцол дээр сууж буй тул тал бүрийг зохицуулах овсгоотой, бас хатуу зарчимтай хүн байхгүй бол  болохгүй. Ц.Оюундарь харин өнгөрсөн оны сүүлчээр “Би намын Ерөнхий нарийн бичгийн даргын ажлаа 2016 он дуустал ямар ч байсан хийнэ. Намаа сонгуульд бэлтгэнэ” гэж байсан боловч гэв гэнэт энэ бдолоосоо “урван” Үндэсний олон нийтийн радио телевизийн Ерөнхий захирал боллоо. Хууль эрх зүйн хувьд маргаан дагуулсан түүний энэ сонголтын цаана З.Энхболд сууж байсан гэх яриа ч олны дунд түгэж байна. Үнэн болов уу. Харин одоо Ц.Оюундарийн оронд сайд асан А.Гансүх, Ерөнхийлөгчийн зөвлөх Л.Эрхэмбаяр нар өрсөлдөж,  аль нэг нь АН-ын Ерөнхий нарийн бичгийн даргаар томилогдох сурагтай. А.Гансүхийн хувьд З.Энхболдын ойрын хүн гэгддэг тул Ерөнхий нарийн бичгийн дарга болох өндөр магадлалтай юм байна. Гэхдээ АН-ын ҮЗХ хуралдаж шийднэ. Энэ хоёр хүнээс гадна гуравдахь хүн ч бас өрсөлдөж магадгүй. 

Б.Баяр