“Нүүрс” хөтөлбөрийн хэргээр ял сонсоод удаагүй байгаа Л.Гансүх нарт холбогдох шүүх хурал олон нийтэд нээлттэй болсон. Тэгвэл дээрх шүүх хуралд “Багануур” ХК хохирогчоор оролцсон юм. Ингэхдээ хохирогч “Багануур” ХХК-ийн Санхүүгийн албаны дарга Очирлхам ““Багануур" ХК АТГ-т хандаж гомдол гаргаагүй.  Шинжээч нар хохирсныг тогтоосон байсан. Нэгдүгээр шугамаар гарч байгаа том нүүрсийг 39000 төгрөгөөр зардаг.  Харин хоёрдугаар шугамаар гарч байгаа нүүрсийг  “Эс Жи Эс Эл Би Ди” ХХК-д 27500 төгрөгөөр өгдөг байсан. Гуравдугаар шугам нь нунтаг буюу станцад өгдөг нүүрс. Манай компани станцад нийлүүлдэг 20500 байсан нүүрсээс ашигтай ажилласан. Харин иргэдэд 39000 төгрөгөөр худалддаг байсан нүүрснээс алдагдал хүлээсэн” гэх тайлбар өгсөн байдаг. 

Түүнчлэн “Багануур ХК”-ийн гүйцэтгэх захирал М.Отгонбаяр “Хохирлыг мэргэжлийн байгууллага тогтоосон. Манай байгууллага гомдол гаргасан зүйл байхгүй.  АТГ хохирогч гэсэн чиглэл өгсөн учраас л бид хохирсон. Гэрээнд зааснаар нүрсний тооцоог бүрэн хийсэн. Гэрээнд 1 тонн нүүрсийг 27500 төгрөг гэж заасан. Шигшиж ангилах төхөөрөмж компанийнх. Манайхаас ямар нэгэн зардал гардаггүй” гэсэн. Үндсэндээ “Нүүрс” хөтөлбөр хэрэгжүүлэх явцад 1 тонн нүүрсийг 27500 төгрөгөөр зараад “Багануур” ХК алдагдалтай ажиллаагүй байна. 
   
 Тэгвэл ийнхүү нээлттэй шүүх хурлын үеэр 1 тонн нүүрс 27500 төгрөгөөр зарсан “Багануур” ХК хохиролгүй байсныг мэдсэн хэсэг жолооч нар тус компаний уурхайгаас 1 тонн нүүрс 27500 төгрөгөөр худалдан авах санал хүргүүлжээ. Тодруулбал, жолооч нар “Багануур” ХК-ийн нүүрсний уурхайн удирдлагуудад уурхайгаас нүүрсийг 27500 төгрөгөөр худалдаж авах хүсэлт тавьсан аж. Тэд “Уг нь уурхайн төлөөлөн удирдах зөвлөлөөс нүүрсээ 39000 төгрөгөөр зарах шийдвэр гаргасан байдаг. Гэтэл Ерөнхий сайд асан Н.Алтанхуяг өөрийн биеэр очин өөрийнхөө ахлах зөвлөхөөр удирдуулж, нүүрсийг 27500 төгрөгөөр авсан гэдгийг бид зурагтаар үзэж харлаа. Тиймээс жирийн иргэд бид ч гэсэн адилхан эрх эдэлж, нүүрсийг 27500 төгрөгөөр худалдаж авна” гэсэн байна. 

    Энэ талаар жолооч нарын төлөөлөл Б.Ягаан “Бид “Багануур ХХК”-ийн нүүрсний уурхайн удирдлагуудтай нүүрсийг 27500 төгрөгөөр худалдаж авахаар гэрээ байгуулахаар албан бичиг хүргүүлсэн. Гэвч одоогийн байдлаар ямар нэгэн хариу өгөхгүй 7, 8 хонож байна. Бид хонон өнжин жагсаж байна. Бид зурагтаар Л.Гансүхийн шүүх хурлыг үзлээ. Хурлын үеэр “Багануур” ХХК-ийн удирдлагууд нүүрсээ 27500 төгрөгөөр зарсан ч алдагдалгүй ажилладаг гэж мэдүүлж байна лээ. Тиймээс миний хувьд Сонгинохайрхан дүүргийн 26-н хорооны 4500 гаруй өрхөд нүүрсээ хямд үнээр өгчихмөөр байна. Бид одоо нүүрсийг 32500 төгрөгөөр худалдан авдаг. Гэхдээ телевизээр нэгэнт 27500 төгрөгөөр зарсан ч алдагдалгүй гэсэн учраас бид бас гэрээ байгуулж ажилламаар байна” хэмээн ярьсан. 

 “Багануур” ХК хохироогүй гэдгээ албан ёсоор мэдүүлсэн. Нээрээ яагаад иргэд 27500 төгрөгөөр нүүрс авч болохгүй гэж гэдэг асуулт гарах нь зүйтэй. Н.Алтанхуяг нарт тодруулбал, дарга нарт болохоор хямд нүүрс зарчихаад алдагдалгүй ажилладаг компани ард иргэддээ хямд өгчихөд болохгүй нь юу байна. Засгийн нэрээр зүсээ хувилгаад ирэхэд хямдарч болоод ард иргэд очихоор алдагдал хүлээнэ гээд сууж байх нь хэр зүйтэй юм бол. Одоо нүүрсний улирал эхэлж байна. Нэгэнт л Улаанбаатарын утааг арилгаж чадахгүй юм чинь иргэд нүүрс түлэх нь ойлгомжтой. Ингэхдээ хямд нүүрс түлбэл зүгээр л байна. Өнөөдөр хоногийн хоолоо яая гэж байгаа иргэдэд 1 тонн нүүрсний зөрүү 5000 төгрөг их мөнгө гэдэг нь ойлгомжтой. 

УИХ-ын гишүүн, Барилга хот байгуулалтын сайд З.Баянсэлэнгэ орон сууцны 8 хувийн зээлийн урьдчилгааг 10 хувь болгосон талаарх мэдээлэл хэт эрт гаргасан хэмээн өмнөх сайдыг буруутгасан. Уг нь энэ 8 хувийн зээл намуудын алинд нь ч сонгуулийн шоу хийхэд хэрэг болох нь ойлгомжтой. Гэтэл Ч.Сайханбилэгийн Засгийн газрын үед энэ хөтөлбөр зогсох нь. Орон сууцны зээлээ зогсоож байгаа бол ядаж иргэдэд Багануурын нүүрсийг Н.Алтанхуягт хямдруулсан шигээ өгвөл зүгээр юмсан. 

Г.НАРАН 

Эх сурвалж http://www.info.mn