УИХ-ын НББСШУБХ-ны өнөөдрийн хуралдаанаар Хамтын тэтгэврийн тухай хуулийн төсөл болон Нийгмийн даатгалын сангаас олгох тэтгэвэр, тэтгэмжийн тухай хуульд нэмэлт, өөрчлөлт оруулах тухай хуулийн төслүүдийг хэлэлцэхээр төлөвлөөд байгаа. Гэтэл өглөөний 09 цагт эхлэх ёстой хурал МАН-ын бүлгийн гишүүд бойкотолж хуралдаа орж ирээгүйн улмаас ирц бүрдэлгүй, бүтэн гурван цаг гаруй хүлээлгэлээ. Байнгын хорооны дарга арга ядахдаа хөлөө гэмтээгээд акттай байгаа гишүүн Л.Эрдэнэчимэгийг хүртэл суга таягтай нь дуудаж авчирч сая байнгын хорооны хуралдааныг эхлүүлэв. Төрийн ажлыг ярьж хэлэлцээд явуулж болох байтал үг хэл ч үгүй хуралдаа ирэхгүйгээр ажил уясан МАН-ын гишүүдэд өглөөний 9 цагаас байнгын хороонд орж суусан хүмүүсийн ундууцал багагүй хүрсэн биз.

МАН-ын бүлгээс малчдын тэтгэврийн насыг наашлуулах тухай хуулийн төсөл санаачилсан ч Ардчилсан намын бүлгийнхэн малчдын тэтгэврийг тогтоохдоо ажилласан 1 жилийг нь 1,2 жилээр тэнцүүлэн нэмж тооцох агуулга бүхий хуулийн төсөл санаачилж, уг хуулийн төсөл дээр хоёр бүлэг тохиролцсон удаатай. Гэвч энэ удаа Хамтын тэтгэврийн тухай хуулийг хамт хэлэлцэх гэж байгаад МАН-ын бүлгийнхэн эгдүүцэж, хэлэлцүүлгийг хойшлуулахыг шаардсан сурагтай. Хамтын тэтгэврийн тухай хуулийн 2014 оны 1 дүгээр сард анх өргөн барьснаас нь хойш МАН үргэлж хэлэлцэхээс цааргалсаар одоо бараг 2 лахь жилдээ орох гэж байгаа хуулийн төсөл гэж эх сурвалж хэлэв. Учир нь Хамтын тэтгэврийн тухай хууль нь нийгэмд маш их хүлээлт үүсгээд байгаа. Ямар хуулийг хэн санаачлав гэдгээс үл хамаарч, уг хууль улс орон, ард түмний эрх ашигт нийцэж байна уу, үгүй юу гэдэгт л илүү ач холбогдол өгмөөр юм даа.