НИТХ-ын дарга Ц.Сандуйг өөрийнх нь хүсэлтээр үүрэгт ажлаас нь чөлөөлсөн хуралдаан болж өнгөрөв. Гэхдээ Ц.Сандуйн хувьд МАН-ын ялагдлын бүх бурууг өөртөө үүрч, улстөрийн хариуцлага хүлээхийн учир ажлаасаа сайн дураар чөлөөлөгдөнө гэдгээ эртнээс мэдэгдсэн тул өчигдрийн хуралдааны үр дүнг олон нийт төдийлөн ойшоосонгүй. Харин хуралдааны үеэр МАХН-аас НИТХ-д орсон Б.Жагар гэгч нөхөр эртнээс бэлдэж хуйлсан 4-5 оймсыг Ц.Сандуй руу шидэлж, "Зайл" гэхчлэн элдэв хараал, доромж үгс урсгасан нь чухам дуулиан болов.

Мэдээж Ц.Сандуйн хувьд албан тушаалаа өгөхгүй гэж эсэргүүцээгүй. Тийм байтал түүн рүү хурц хэлбэрийн эсэргүүцэл илэрхийлэн, оймс шидэлж, зайлахыг шаардсан нь бараг л илүү үйлдэл болсон нь ойлгомжтой. Хамгийн гол нь Б.Жагарын энэ үйлдлийг олон нийт сайшааж хүлээн авсан нь юу л бол. Гудамжны тэмцэгч, хий лоозогногч, өсөрхөн туйлшрагч нарыг улстөрд оруулснаар юунд хүрснээ ард түмэн ухамсарлаж эхэлсэн.

Тиймээс Б.Жагарын энэ үйлдэл 2016 оны УИХ-ын сонгуульд Дархан-Уул аймагт нэр дэвшсэн Л.Наранбаатарынхтай эгээ адил зорилготой байсан гэж олон нийт үзэж байна. Тухайн үед Л.Наранбаатар хэмээх залууг иргэд төдийлөн сайн мэддэггүй байсан. Бүр энэ юун хүн нэр дэвшээд байна гэж асууж байсан хүн ч олон. Тэгэхэд Л.Наранбаатар УИХ-ын дарга З.Энхболд руу оймс шидсэн нь түүнийг ямартай ч олны хараанд өртүүлсэн. Гэхдээ улстөрийн соёл, хувь хүний төлөвшил гээч зүйлийг мань эр таг мартсан байсан тул олны талархлыг хүлээх байтугай эгдүүцлийг төрүүлсэн ба эцэст нь тэрбээр үнэмлэхүй ялагдал хүлээж байв.

Тэгвэл НИТХ-ын хуралдааны үеэр Ц.Сандуй руу оймс шидсэн Б.Жагарыг одоо олон нийт мэддэг болсон ч энэ хүн баатарлаг, зоригтой гэхээс илүүтэй хоромхон зуурт л "Оймс" Жагар гэж хочлоод, дооглож тохуурхаж байна. Өөрөөр хэлбэл, тэрбээр санасандаа хүрч олны танил болж чадсан ч сайн биш муу талаараа зартай болсон гэсэн үг.

Яг үнэндээ тэрбээр байгаа зөв онилсонгүй. Учир юу гэвэл Ц.Сандуй нэгэнт өөрөө суудлаасаа бууж байгаа. Нөгөөтэйгүүр тэрбээр улсын хувь заяаг шийдвэрлэх чухал бодлого тодорхойлогч биш. Түүнд ядаж төсвийг захиран зарцуулах ч эрх байхгүй. Мөнөөх тендер, улсын бүтээх байгуулах ажлаас бол бүр хол хөндий. Түүний хувьд нийслэлээс ИТХ-д сонгогдсон төлөөлөгчдийн хурлыг удирдах л үүрэгтэй бөгөөд үндсэн шийдвэрүүдийг иргэдийн төлөөлөгчдийн дийлэнх олонхийн саналаар л баталдаг.  Тиймээс Б:Жагарын энэ үйлдэл нэгдүгээрт цаг үе, эзнээ олсонгүй. Хоёрдугаарт, тэрбээр хууль зөрчсөн үйлдэл гаргасан тул хуулийн байгууллагаас Зөрчлийн хуулийн дагуу шийтгэл оногдуулж магадгүй болжээ.

Ер нь Ц.Сандуй энэ мэт доромжлол амсах ёстой хүн мөн үү. Түүний хувьд НИТХ-ын даргаас гадна Нийслэлийн МАН-ын хорооны даргын албыг хашдаг. Улстөрд зоригтойгоор алхан орж ирсэн залуу хүний хувьд энэ бол амжилт. Нөгөө талаар НИТХ-ыг сайн удирдаж байсан тэрбээр өөрийн намаар зогсохгүй бусад улстөрийн хүчин дунд ч нэр хүнд сайтай байсан. Энэ нь өрөөл өрсөлдөгчдийнх нь эгдүүцэл, атаархлыг төрүүлсэн нь тодорхой. Тиймээс ч 60 тэрбумын асуудалд түүнийг онилон байж орооцолдуулсан нь илэрхий болсон. Харин эсрэг талынхан үүнийг ашиглаж Ц.Сандуйг харлуулах ажлаа ч чадамгай хийсэн ч эцэстээ хууль, шүүхийн байгууллагын шалгалтаар түүнийг үүнд холбогдолтойг нотолж чадаагүй. Ц.Сандуйн хувьд хуулийнхны шаардсан бүхий л зүйлийг гаргаж өгсөн ба сайн дураараа шалгуулж байсныг олон нийт санаж байгаа биз ээ.

Тиймээс Б.Жагар мэтийн олонд хараалагдаж л байвал Нийслэлийн ЗДТГ-ын үүд хаалгыг эвдэлж, улсын эд хөрөнгийг бусниулах, хэвлэлээр бусармаг гүтгэлэг тарааж, хүний нэр хүндийг шороотой хутгахыг юман чинээ тоохгүй этгээдүүдэд зүгээр нэг доромжлуулах хүн нь Ц.Сандуй яавч биш. Б.Жагарын тухайд оймсны дуулиан дэгдээснээсээ хойш олонд чухам баалуулж байна. Түүний талаарх мэдээлэл цахим сайт бүрээр гарч байгаа бөгөөд тэр бүгдийн дорх сэтгэгдлүүдийн ихэнх нь сөрөг байх аж. Тухайлбал, "Улстөрийн соёл байтугай угийн ухамсаргүй этгээд төрд орвол бусад руугаа хутга шидэх юм байна", "Эхнэр хүүхдээ орхисон энэ этгээдэд эх оронч сэтгэл байна гэж юу байх вэ", "Олонд танигдах менежмент л байх" гэцгээсэн байв.

Өөрөөр хэлбэл, Б.Жагар нэр төрөөрөө биш сенсааци, гутамшгаараа алдаршиж чадлаа.

Х.Маргад