ХЗДХ-ийн сайд Б.Энхбаяр "Аюуд тауэр” газрын асуудлаар хэд хэдэн удаа нээлттэй мэдэгдэл хийж байсан.

Улмаар "Аюуд" ХХК-иас Б.Энхбаярыг нэр хүндэд халдсан үндэслэлээр шүүхэд ханджээ. Хэрэг Чингэлтэй дүүрэг дэх Иргэний хэргийн анхан шатны шүүхэд шийдвэрлэгдэж байна.

Харин хэрхэн хянан шийдвэрлэх үйл ажиллагааны явцад Б.Энхбаяр шүүхийн мэдэгдэх хуудсыг хүлээн авсан боловч хүндэтгэн үзэх шалтгаангүйгээр хүрэлцэн ирээгүй аж. Нэхэмжлэлийг гардаж аваагүй юм байна. Хэрэг хянан шийдвэрлэх ажиллагаанд саад учруулж байна гэж шүүгч үзжээ.

Улмаар дөрөвдүгээр сарын 23-ны өдөр Чингэлтэй дүүрэг дэх Иргэний хэргийн анхан шатын шүүхийн шүүгч Т.Энхтуяа ХЗДХ-ийн сайд Б.Энхбаярыг албадан ирүүлэх захирамж гаргажээ.

ХЗДХ-ийн сайд  Б.Энхбаяр “Засгийн газраас гадаадын хөрөнгө оруулалтыг тонодог асуудлын эсрэг хоёр жилийн өмнө ажлын хэсэг гарсан. Энэ хүрээнд нийт 50 гаруй гадаадын хөрөнгө оруулагчдыг дээрэмдсэн байж болзошгүй гомдлыг цэгцэлсэн. Үүнтэй холбогдуулан “Аюуд тауэр“-ийг хууль бусаар “дээрэмдсэн“ алба хаагчдад хариуцлага тооцсоны төлөө намайг Хятадад үйлчилсэн мэтээр гүтгэлэг тарааж байна” хэмээн ярьж байсан юм.