Монголчууд эрх зүйн мэдлэг тааруугаасаа үүдэн гэмт хэргийн золиос болж буй тохиолдол эрс нэмэгдэх хандлагатай болж буйг мэргэжлийн байгууллагаас анхааруулж байна.

 Баримт татвал, төрийн албан хаагч 27 настай Э гэх эмэгтэй хэлмэрч дүүтэйгээ амрахаар өмнөд хөршийг зорьж явахдаа хар тамхи зөөдөг гэмт этгээдүүдийн золиос болж баригдсан хэрэг явдал өнгөрөгч онд гарч байв.

Тэгвэл хятадын ардын шүүхээс 24 настай Б-д цаазын ял оноосон талаар эх сурвалжийн мэдээлэл байна.  Хэрэг явдлын талаар сануулахад, брэндийн бараа нэрээр хар тамхи зөөдөг гэмт бүлэглэлд хэлмэрч хийдэг эмэгтэй төрсөн эгчийгээ ээлжийнх нь амралтаар хятад руу  газар үзүүлэхээр дагуулж явсан аж. Харамсалтай нь хэлмэрч хийлгэж байна гэх этгээдүүд эгчийнх нь  тээшинд нууцаар хар тамхи хийсэн байсныг хятадын хилийн цагдаагийнхан илрүүлж улмаар дээрх бүсгүй хятадын шүүхээс цаазын ял сонсоод байгаа юм.

Гэмт этгээдүүд ч эгч дүү хоёрт брэндийн бараа дайлгах нэрээр хар тамхи зөөлгөжээ. Хэрэг явдал гарсан өдөр эгч дүүс хамт онгоцонд суухаар төлөвлөсөн ч дүүд нь ажил гарч онгоцноосоо хоцорсон бол эгч нь онгоцны буудлаас цагдаагийнханд саатуулагджээ. Энэ талаар сураг сонссон дүү нь тээшээ хаяж зугтаснаар арай гэж Монголын хил нэвтэрчээ. Харин эгч нь хятадын ардын шүүхээс цаазын ял сонссон эмгэнэлт хэрэг гарсаар л байна.

Цаазын ял сонссон 27 настай Э эмэгтэйн хувьд өндөр боловсролтой, төрийн байгууллагад ажилладаг нэгэн байсан бөгөөд гэмт этгээдүүдийн золиосонд өртөж яваагаа ч баригдах хүртлээ мэдээгүй гэдгээ шүүх хурлын үеэр олон удаа хэлсэн  боловч цаазын ялаас мултарч чадаагүй аж. 

Сэрэмжлүүлэг болгож мэдээлэхэд, сүүлийн үед монголчууд өмнөд хөрш рүү зорчихдоо ачаа тээшээ хэрхэн авч явах, бусдын дайлгасан эд зүйлийг санамсаргүй авснаас үүдэн гэмт хэргийн золиос болж буй тохиолдол нэг биш удаа гарч байгааг цагдаагийн байгууллагаас сэрэмжлүүлж байна.

Үүнээс гадна  хөрш  улсынхаа хууль тогтоомж хатуу чанга гэдгийг ч мэдэхгүй гэмт хэргийн золиос болж буй баримтууд ар араасаа хөвөрсөөр байна.