Улаанбаатар /МОНЦАМЭ/. Малайз улсад үргэлжилж байгаа хөнгөн атлетикийн 21 дэх удаагийн Ази тивийн ахмадын аварга шалгаруулах тэмцээнд хурд, хүчээ сорьж буй манай тамирчид 6 алт, 6 мөнгө, 4 хүрэл медаль хүртээд байна.

Азийн 29 орны 3000 орчим тамирчин оролцож буй тус тэмцээний эхний өдрүүдэд 85 настай Ц.Раднаа дөрвөн алтан медаль хүртсэн юм. Тэрбээр өөрийн насны ангиллын 400 метрийн зайд 81.82 секундийн амжилтаар түрүүлж, Азийн аварга, дээд амжилтын эзэн болсон бөгөөд дахин гурван төрөлд /200 метр, 80 метрийн саадтай гүйлт, гурвын харайлт/ түрүүлсэн.

Мөн Г.Наранцэцэг /бөөрөнцөг түлхэлт/, Ж.Түмэнжаргал /зээрэнцэг шидэлт/, Д.Ариунжаргал /5000 метр/, Д.Дамдинжав /5000 метр/, А.Цогзолмаа нар мөнгө, Д.Одончимэг /бөөрөнцөг түлхэлт/, Э.Хүүхнээ /өндрийн харайлт/, Ц.Нэргүйбаатар /зээрэнцэг шидэлт/ тус тус хүрэл медалиар энгэрээ мялаав.

Харин гавьяат тамирчин, 82 настай Т.Цэрэндолгор жад шидэлт, бөөрөнцөг түлхэлтийн төрөлд түрүүлж, тивийн аварга болсон төдийгүй хоёуланд нь Ази тивийн дээд амжилтыг шинэчилсэн байна.