Зам тээврийн хөгжлийн яамны газрын даргаар ажиллаж байх үедээ ажлын байран дээрээ архидан согтуурч, улмаар хамт ажилладаг Т.Гомбосүрэнг хэрцгийгээр зодож, амь насыг нь хөнөөсөн хэмээн буруутгагдаад байгаа Б.Махбал энэ ням гарагт суллагдахаар боллоо хэмээн мэдээлэл гарсан билээ. 

Монгол Улсын Эрүүгийн хуульд заасны дагуу Б.Махбалд холбогдох хүн амины хэргийг нэг жил зургаан сарын хугацаанд шүүхээр дэнсэлж, ял шийтгэл оногдуулж чадаагүй учраас Эрүүгийн хэрэг хянан шийдвэрлэх тухай хуулийн 14.10 дугаар зүйлийн 14.10.2-т заасныг баримтлан түүнийг ирэх ням гаригт буюу хоёрдугаар сарын 8-ны өдөр суллана гэж мэдээлэл гарсан.

Харин үүнийг Улсын ерөнхий прокурорын газраас үгүйсгэлээ. 

Хэргийг эргэн сануулахад, Б.Махбалд Нийслэлийн прокурорын газраас Эрүүгийн хуулийн тусгай ангийн 10.1 дүгээр зүйлийн 2 дахь хэсгийн 2.1 дэх хэсэг буюу хүнийг онц хэрцгийгээр амь насыг нь хөнөөсөн гэх зүйлчлэлээр яллах дүгнэлт үйлдэж, хэргийг шүүхэд шилжүүлсэн ч өнгөрөгч арванхоёрдугаар сард болсон шүүх хурлын үеэр Б.Махбал өөрийгөө хохирогч хэмээн мэдүүлсэн бөгөөд шүүхээс уг хэргийг мөрдөн байцаалтад буцаагаад байсан юм.