ХӨСҮТ-ийн Тандалт, судалгааны албаны дарга А.Амбасэлмаа: 2020 оны арванхоёрдугаар сарын 27-ны өдөр 8,894 хүнд PCR шинжилгээ хийсэн. 16 хүний шинжилгээнд шинэ коронавирусийн халдвар илэрлээ. Үүнээс 10 нь Баянзүрх дүүргийн нэгдсэн эмнэлэгт гарсан голомтоос илэрсэн бол 6 нь Цэргийн төв эмнэлгийн ажилтнуудаас илэрсэн. Улсын хэмжээнд нийт батлагдсан тохиолдол 1137 болж, харин дотоодын нийт халдварын тоо 666 боллоо. 

Тэрбээр “Арванхоёрдугаар сарын 27-нд хийсэн шинжилгээнүүдээс 16 хүний сорьцод коронавирус илэрлээ. 16 тохиолдол бүгдээрээ Улаанбаатар хотод бүртгэгдсэн бөгөөд 10 нь БЗД-ийн нэгдсэн эмнэлгэд гарч байгаа халдвартай холбоотой байна. Тэдний хоёр нь өвчтөн бол найм нь гэр бүлийн гишүүд байгаа юм.  Зургаан тохиолдол нь Цэргийн төв эмнэлгийн эмч, сувилагч, ариутгагч нар байна. Эдгээр хүмүүс ажиглалт тусгаарлалтын 14 хоногийн хугацааныхаа 7 дахь хоногт халдварт өртсөн. 

БЗД-ийн нэгдсэн эмнэлэгт гарсан халдварын тоо 194 боллоо. Үүнээс эрүүл мэндийн ажилтан 19, гэр бүлийн гишүүн 59, өвчтөн 86, сахиур 24, хавьтлаас 6 хүн байгаа юм. 

Улсын хэмжээнд халдварын батлагдсан тохиолдол 1,137 болсон бол үүнээс 711 хүн эдгэрсэн байна. Эмчлэгдэж байгаа 416 хүний биеийн байдлыг үнэлбэл, маш хүнд 2, хүнд 8, хүндэвтэр 56, хөнгөн 350 байгаа" гэв.

Сүүлийн 24 цагийн дотор Сэлэнгэ, Дархан-Уул, Говьсүмбэр, Орхон, Архангай, Дорноговь аймгийн голомтоос батлагдсан тохиолдол бүртгэгдээгүй. Мөн Улаанбаатар хотын өмнөх батлагдсан тохиолдлуудаас батлагдсан тохиолдол бүртгэгдээгүй.