Сургууль, цэцэрлэгийн бэлтгэлтэй холбоотойгоор замын хөдөлгөөний ачаалал нэмэгддэг. Тиймээс уг асуудлыг зохицуулахын тулд наймдугаар сарын 26-наас есдүгээр сарын 15-ны өдрийг хүртэл автомашины улсын дугаарын тэгш, сондгойгоор хөдөлгөөнд оролцуулах шийдвэрийг холбогдох байгууллагаас гаргаад байгаа билээ.

Харин үүнийг зарим иргэд эсэргүүцэж, хөдөлгөөн зохицуулж буй алба хаагчидтай зүй бусаар харьцах тохиолдол цөөнгүй гарах болов. Тэгвэл өнөөдөр цахим орчинд Тээврийн цагдаагийн алба хаагчтай зүй бус харьцаж буй иргэний талаарх бичлэг цацагдаж, олны дургүйцлийг төрүүлээд байна. Уг асуудал цагдаагийн байгууллагад бүртгэгдсэн эсэх талаар тодруулахад "Өнөөдөр цахимд явж буй энэ бичлэг 2023 оны наймдугаар сарын 29-ны өдөр болсон үйл явдал бөгөөд тухайд үед нь иргэнд А-д ЗТХ-ийн 15.2-д зааснаар торгуулийн арга хэмжээ авч шийдсэн" гэлээ.