Талийгаач С.Алунгуаг дайрсан гэх жолоочийн өмгөөлөгч Ундрах-Оргил мэдээлэл хийлээ.

Тэрбээр "наймдугаар сарын 06-ны өдөр харамсалтай зүйл болсон. Талийгаачийн ар гэрийнхэнд гүн эмгэнэл илэрхийлье. Өмгөөлөгчийн мэргэжлийн ёсзүйн 18-р зүйлд заасны дагуу нийтэд ил тодорхой болсон хэргийн талаар өмгөөлөгч холбогдох мэдээллийг өгч болно гэдэг. Үүнийхээ дагуу мэдээлэл хийж байна. Өмгөөлөгч миний биеийг болон миний үйлчлүүлэгчийг илт гүтгэсэн худал мэдээллийн шинжтэй байгаа тул хариулт өгье. Талийгаачийн ар гэрт миний үйлчлүүлэгчийг ажил явдалд мөнгө өгөөгүй гэсэн. Осол гаргасан жолооч нь зам тээврийн осол гарсан цагаас өнөөдрийг хүртэл талийгаачийн ар гэртэй байнга холбоотой байж, уучлал хүсч, тодорхой зардал, мөнгөн тусламж үзүүлж байсан. Өөрөө тэтгэврийн зээл авч 10 орчим сая төгрөг хохирогчийн ар гэрт өгөх хүсэлт тавьсан. Хохирогчийн ар гэрт хуулийн байгууллагын шийдэх асуудал дуусаагүй байгаа ч одоогоор  10 сая төгрөгийг өгөх санал тавьсан ч ар гэр нь хүлээж аваагүй ээ. Бид хүүхдийн тэтгэмж, байр байшин авна. Хууль ёсны төлөөлөгч гэх Эрдэнэбаатар гэдэг хүн нь 30 сая төгрөг өг гэсэн. Мөн үүний дараа талийгаачийн ар гэр гэх н.Эрдэнэбаатар гэх хүн манай үйлчлүүлэгчээс  30 сая төгрөг, унаж яваа машиныг нь авна гээд шилжүүлж өгөх байдалд хүрэхэд авахаа болилоо бид сошиалд цацна хэмээн сүрдүүлсэн. Миний үйлчлүүлэгч зам тээврийн осолд холбогдсон өдрөөс хойш өнөөдрийг хүртэл холбоотой байж, эд зүйлсээр тусалсан. Өмгөөлөгчийн хувьд талийгаачийн ар гэрийхэнтэй нэг ч удаа уулзаагүй. Тодорхой хэмжээний эд зүйлээр тусалж, эхний ээлжинд 10 сая төгрөг өгөх санал гаргасан ч хохирогчийн ар гэр татгалзсан. Манай үйлчлүүлэгч тэтгэвэрт гарсан, 60 гаруй настай хүн. Хэрэг хянан шийдвэрлэх ажиллагаа явж байгаа учраас илүү дэлгэрэнгүй мэдээлэл өгөх боломжгүй. Тухайн өдөр юу болсон бэ гэхээр талийгаач нас барсан өдрөө найзуудтайгаа уулзаж, тодорхой цагт архидан согтуурсан байсан бөгөөд гарцгүй газраар зам хөндлөн гүйж яваад осолд орсон. Өмгөөлөгчийн зүгээс хүний амь нас хохирсон байхад машины гэрэл төлүүлнэ гэж дайрсан гэсэн мэдээллийг олон нийтэд өгч байгаа. Өмгөөлөгчийн хувьд хагарсан гэрэл төлүүлнэ гэдэг зүйл огт яриагүй. Ослын үеэр ч машины гэрэл хагарч, гэмтээгүй. Яаж ч бодсон хүний амь нас үрэгдчихээд байхад гэрэл нэхээд явна гэдэг ямар ч хуульч, өмгөөлөгчид нэхэж явах ёсзүй байхгүй ээ. Хэрэгт байгаа баримтын дагуу л би согтууруулах ундааны зүйл хэрэглэсэн байсан гэдгийг хэллээ. Миний үйлчлүүлэгч зам тээврийн осолд холбогдсон цагаас хойш харамсаж, уучлал хүсч, биеийн эрүүл мэндийн хувьд ч хүнд байгаа. Олон нийтийн мэдээллийн хэрэгслээр олон нийтэд миний үйлчлүүлэгч, өмгөөлөгчийг худал гүтгэлэг тарааж байгаад харамсаж байна. Буруу мэдээлэл өгч нэр хүндэд халдсан тул би холбогдох хуулийн байгууллагад хандаж байгааг хэлье. Талийгаачийн эд эрхтэнг авсан зүйлд өмгөөлөгч холбоогүй. Зөвхөн замтээврийн ослын хэрэгт л ажиллаж байгаа" гэлээ.