Комедиан Амараа буюу Д.Амартүвшин нарын иргэд Монголын Либертари Нам гэгчийг үүсгэн байгуулсан ч Улсын дээд шүүхээс намыг нь бүртгэхээс татгалзсан байдаг. Тэгвэл тус нам Ардчилсан Намтай нэгдэж, сонгуульд хүч үзэхээр болжээ. Өөрөөр хэлбэл тус намын төлөөлөл АН-аас УИХ-ын 2024 оны сонгуульд өрсөлдөх юм.

Д.Амартүвшин “Өнгөрсөн долоо хоногт манай намд зургаан намаас санал тавьсан. Улмаар бид намаараа маш олон удаа ярилцаж, санал хураалт явуулсан. Үүний үр дүнд олонхын саналаар Монголын Либертари нам 2024 оны сонгуульд Ардчилсан намтай хамтарч оролцохоор боллоо. Энэхүү боломжийг олгож байгаа АН-д баярлаж буйгаа илэрхийлье" гэлээ.

АН-ын дарга Лу.Гантөмөр "Монгол Улс хөгжихгүй байгаа шалтгаан бол төрийн алба данхайж, хэт томорсон, төр бүгдийг шийдэх гэж оролддог, төлөвлөгөөт эдийн засгийн хэв маягаас салаагүй, өмчийн эрхийг уландаа гишгэсэн, хүний эрхийг хааж боогдуулсан гэдэг зүйлс яригддаг. 

Либертари Намын үзэл санаа бол монгол хүн өөрийнхөөрөө баймаар байна гэж байгаа. Энэ нь Монголын хөгжлийн нууцыг бүрэн дүүрэн илэрхийлж байгааг хэлмээр байна. Монгол орон бол монгол хүн бүрийн хөдөлмөр, сэтгэлгээ, оюун санаан дээр хөгжил дэвшил ирнэ гэдэгт итгэлтэй байдаг. Үүнийг тод томруунаар, энгийнээр илэрхийлж чаддаг залуу үе гарч ирсэнд бид талархаж байгаа. Залуу үеэ цаашид мөрөөдлөө ажил хэрэг болгож, мөрөөдөж байгаа нийгмээ Монгол Улсад байгуулаасай гэж хүсэж, түүндээ хүрэхэд АН гүүр болъё гэсэн шийдвэр гаргаж байгаа" гэлээ. 

Либертари Намын УЗ-ийн дарга Д.Хишгээ "Бидний бизнес хийх орчин цаг өдрөөр хумигдаж байгаа. Үүнийг либертари үзэл баримтлал залуус төр маш их данхайж, бизнесийн үйл ажиллагаанд оролцож, маш их эрх мэдэлтэй болсны уршиг гэж харж байгаа. Зүүний улс төрийн бодлогыг тасралтгүй хэрэгжүүлсний хор хохирол нь 30 жилийн дараа гараад ирж байна. Бид уг нь амьдрах орчноо сайжруулахын төлөө татвар төлдөг боловч зориулалтаараа хэзээ ч зарцуулагдахгүй байна, дээрэм хийж байна. Үүний эсрэг тэмцэх шаардлагатай байгаа" гэв.

Тус намын дарга Д.Амартүвшин "Либертари үзэл санаа бол жирийн иргэдийн үзэл санаа. Өдөр бүр ажлаа хийгээд ихэнх цалингаа төрд дээрэмдүүлж байгаа, үүнийг буруу гэж бодож хүн бүрийн үзэл санаа юм. Татварыг буулгах, данхар төрийг жижиглэхийн төлөө АН-тай хамтарч энэ сонгуульд оролцохоор боллоо" гэлээ.