УИХ-ын чуулганы нэгдсэн хуралдаанаараа АТГ-ын даргыг улируулан томилох Ерөнхий сайдын саналыг хэлэлцэж байна.

Хэлэлцэж буй асуудалтай холбогдуулан гишүүд асуулт асууж, үг хэлэв. Энэ үеэр УИХ-ын гишүүн Д.Батлут зарим гишүүнд сонгуулийн үеийн амлалтыг нь санууллаа.

Тэрбээр “Хойд бүсээс сонгогдсон гишүүдийн нэг Х.Баттулга Эрдэнэт хотод очиж ажиллах үеэрээ иргэн байгалийн баялгаас хувь хишиг хүртэх ёстой гэж ярьсан. Сонгуулийн үеэр 10 сая төгрөгийн хэрэглээний зээл авсан өрхүүдийн зээлийг тэглэнэ гэж ярьж явсан. Бодоод байсан чинь зээл тэглэх санхүүгийн эх үүсвэр нь тодорхой байсан юм байна.

Төгрөг нуурын ордыг 250 сая ам.доллароор зарж. Одоогийн ханшаар тооцох юм бол 830 тэрбум төгрөг болж байгаа. Манай хойд бүс 80 гаруй мянган өрхтэй. Тэгэхээр үнэн байж.

Х.Баттулга гишүүн ээ айл өрхийн хэрэглээний зээлийг хэзээ тэглэх вэ. Би үүнийг нэхэж ажиллана. Сонгогчдынхоо өмнөөс талархаж байна” хэмээв.