Цахим орчинд зар байршуулж, насанд хүрээгүй охидын биеийг үнэлүүлж байсан бүлэг этгээдийн үйлдлийг илрүүлж, шүүхэд шилжүүллээ.

Насанд хүрээгүй охидын эмзэг байдлыг далимдуулж 2024 оны зургаадугаар сараас аравдугаар сарыг хүртэлх хугацаанд цахим орчинд "санхүү авна" гэх зар мэдээллийг байршуулж бусдад биеийг нь үнэлүүлдэг байсан этгээдүүдийн үйлдлийг цагдаагийн байгууллагаас илрүүлжээ.

Мөрдөн шалгах ажиллагааны явцад нэр бүхий  этгээд нь цахим зарын дагуу холбогдсон иргэдэд насанд хүрээгүй охидыг хүргэж өгөх нэрийдлээр бусдыг дээрэмдэх, залилах, эд хөрөнгийг авахаар заналхийлэх, хүний эрүүл мэндэд хохирол учруулах зэрэг гэмт хэрэг үйлдсэн болохыг шалгаж тогтоон Эрүүгийн хуулийн тусгай ангийн 12.3 дугаар зүйлд заасан бэлгийн мөлжлөгийн гэмт хэрэг үйлдсэн болон бусад хууль бус үйлдлүүдэд яллагдагчаар татан энэ оны наймдугаар сарын 20-ны өдөр хэргийг шүүхэд шилжүүлэх саналтай прокурорын байгууллагад хүргүүллээ.

Энэ төрлийн гэмт хэрэг үйлдэгч этгээдүүд нь эцэг, эх, асран хамгаалагчийн хараа хяналт сул охидыг эрхшээлдээ оруулж, хохирогч болгож байгаа тул эцэг, эх, асран хамгаалагч та бүхэн хүүхдэд тавих хараа хяналтаа сайжруулахыг цагдаагийн байгууллагаас анхааруулж байна.