Цагдаагийн байгууллагаас цаг үеийн асуудлаар өнөөдөр хэвлэлийн хурал зарлаж, мэдээлэл өгөв. 

Тодруулбал сургууль, цэцэрлэгийн үйл ажиллагаа эхлэх гэж байгаатай холбогдуулан “Хичээл эхэллээ” арга хэмжээг есдүгээр сарын 1-4-нд зохион байгуулах талаараа мэдээллээ. 

“Хичээл эхэллээ” арга хэмжээний хүрээнд цагдаагийн байгууллагын 5,200 алба хаагч сургуулийн орчинд эргүүл хяналт шалгалт хийж, замын хөдөлгөөний аюулгүй байдлыг хангах чиглэлээр ажиллана.

Улсын хэмжээнд ерөнхий боловсролын 885 орчим сургуульд гэмт хэрэг, зөрчлөөс урьдчилан сэргийлэх хичээлийг орно. Мөн зам тээврийн осол их бүртгэгддэг сургууль, цэцэрлэгийн бүсүүдэд урьдчилан сэргийлэх хичээлийг орно.

Цахим орчинд “Сургуулийн оноо ахиулж өгнө”, “Элсэлтийн шалгалтад оруулна”, “Улсын сургуульд элсүүлнэ”, “Гадаадын сургуульд хамруулна” гэх мэт зар байршуулж иргэдийг залилан мэхэлж байна. Үүнтэй холбоотой хяналт шалгалт явуулахад нийт 14 гэмт хэрэг бүртгэгдсэн. 

Цагдаагийн байгууллагын хяналт шалгалтын хүрээнд залилах гэмт хэрэгтэй холбоотой мэдээллүүдийг устгуулсан.

Энэ оны эхний найман сард хүүхэд үйлдсэн гэмт хэрэг 27 хувиар буурсан үзүүлэлттэй байгаа. Үүнээс илүү бууруулж, урьдчилан сэргийлэх ажлыг боловсролын байгууллага, иргэдтэйгээ хамтран зохион байгуулж эрчимжүүлэн ажиллана.

Улсын хэмжээнд хүүхэд хохирсон гэмт хэрэг 6.8 хувиар буурсан. Гэхдээ эцэг эхийн хараа хяналт сул, үл хайхрах байдлаас үүдэн хүүхэд гэмт хэрэгт холбогдох, хохирогч болох эрсдэл байгааг цагдаагийн байгууллагаас сэрэмжлүүлэв. 

Мөн хэвлэлийн хурлын үеэр Цагдаагийн Ерөнхий Газрын Гэр бүлийн хүчирхийлэл, хүүхдийн эсрэг гэмт хэрэгтэй тэмцэх хэлтсийн чиглэлийн ахлах мэргэжилтэн, цагдаагийн хошууч Д.Будзаан дараах анхааруулгыг нэмж хэлэв. 

Тэрбээр "Жил бүрийн ес, 10 дугаар сард нэг төрлийн дуудлага мэдээлэл цагдаагийн байгууллагад нэлээд нэмэгддэг.

Хичээл давтуулахтай холбоотой, хүүхдийнхээ гэрийн даалгаврыг хийлгэх, шинэ үсэг сурч байгаа хүүхдүүдтэй холбоотойгоор эцэг эх, хүүхэд хоорондын зөрчил цагдаагийн байгууллагын 102 утас болон 108 утсанд нэлээд ирдэг. Энэ төрлийн дуудлага нэмэгддэг гэсэн үг. 

Тэгэхээр эцэг эхчүүд маань хүмүүжлийн эерэг аргыг ашиглаж, хүүхдийнхээ онцлогт тохируулж хичээлийг нь хийлгэхэд анхаарах шаардлагатай" гэв.