Эдийн засгийн хөгжлийн дэд сайд О.Чулуунбат Хятадын төрийн өмчит Bank of China банкны салбарыг нээх асуудлыг зөвтгөн, тэр ч байтугай манайхыг тоож орж ирье гэвэл олзуурхах хэрэгтэй хэмээн “Банкийг би л мэддэг” гэсэн шиг ярьж суусан. Гэтэл Монголбанкныхан ч тийм санал ирээгүй гэсэн. Ерөнхий сайд ч “Засгийн газрын төвшинд энэ талаар яриа үүсээгүй” гээд мэлзчихсэн. Ингээд “давж дуугарсан” нь тодорхой болсон юм. Үнэн хэрэгтээ УИХ-ын нэр бүхий гишүүд түүнтэй санал нэгдээд зогсохгүй тус банкны салбарыг нээх талаар яаж ийгээд нааштай шийдвэр гаргуулахаар хичээгээд байгаа юм билээ. Үүнийхээ төлөө Монголбанкинд “шахалт” үзүүлэх сураг ч дуулддаг. Харин Эдийн засгийн хөгжлийн дэд сайд О.Чулуунбат бүр сэтгэл зүрхнийхээ угаас “хамааралтай баян амьдрах” зарчмаа баримталдаг, төрсөн газар шороо бол түүний хувьд хамгийн сүүлийн асуудал юм байна гэж бодогдохуйц бас нэгэн түгшүүрт сэдвийг “Цензургүй яриа” нэвтрүүлэгт оролцохдоо ярьсныг нь одоо хэр нь хэн ч анзаарахгүй юм.

Энэ бол “уран олборлох, шар нунтгаа зарж баяжих нь зөв” гэсэн үг, өгүүлбэр түүнээс амнаас унасан явдал. Монголд автозамын ослоор жилд 450 хүн нас барсан, барилгын ажлын үеэр осолдсон, архидаж байгаад амиа алдсан, өвчний улмаас гээд бүх талийгаачийг тус тусад нь  тоолчихож. Тэгээд “Үүнтэй харьцуулахад 10 жилийн дотор дөрвөн тугал үхэх юу ч биш. Үүний цаана маш их ам.доллар орж ирнэ. Гэтэл энэ их ам.доллараас татгалзах нь өөр улс төр яваад байна” гэж О.Чулуунбат дэд сайд яриад байгаа юм.

Энэ хүн Монгол хүн мөн үү. Тэр Сэлэнгийнх. Сонгуулийн үеэр Сэлэнгийнхэнд очоод “Миний нутгийн хөрс шороо хордож л байг, танай тугал үхэж л байг уран олборлоё, түүнийгээ зарж ам.доллар олох хэрэгтэй” гээд яривал түүнийг сонгох болов уу. Сэлэнгийнхэн дотор ам.долларт дуртай хүн байж болох юм. Гэхдээ түүний ам.доллар олох аргыг дэмжих хүн олдохгүй байх гэдэгт найдаж байна.

О.Чулуунбат бүгдийг харийнханд өгье, оронд нь ам.доллар л  авъя гэж сүүлийн арав гаруй жил ярьж байгааг олон хүн мэднэ. Түүнийгээ ч хэрэгжүүлж, “баригдаж”, магадгүй ам.долларын хүчээр торны цаана суучихаагүй үлдсэн нэгэн билээ. Болдогсон бол хүний биеийн эд эрхтэн наймаалагчид түүн дээр ирээд “Ам.доллар өгье, аль нэг эрхтнээ худалдчих” гэвэл дуртайгаа сонгоод ав гээд амьсгалаас бусдыг нь өгчихөж мэдэх хүн. Угаасаа хамгийн эхлээд ичих булчирхайгаа, дараа нь сэтгэл зүрхээ худалдчихсан нь түүний ам.долларын төлөөх гаж сэдлээс мэдрэгдээд байдаг.

            Түүнийг Эдийн засгийн хөгжлийн яаманд удаан “байлгах” тусам уршиг нь ихэднэ гэдгийг олон хүн мэднэ. Гэвч тэр хэзээ, хэнтэй эвсэж, хэдийд хэнээс нуугдахаа хачин сайд мэддэг билээ. Урхи, зангандаа хэдийнэ уургалаад улаан хоолойд нь тултал ам.доллар чихсэн байхад хэн түүнийг зайлуулж дөнгөх билээ. Монголын төрд хэрэгтэй байхын үндэс нь түүнд зөвхөн энэ л болой.