Засгийн газрын Хэрэг эрхлэх газрын дарга Ч.Сайханбилэг мэдээллийн эрин зуунд монголчуудыг хөл тавихад том хувь нэмэр оруулсан хэдий ч завшаанч зарим нэг нөхдүүдэд шал дэмий арга зааж өгсөн нэгэн. Тэрбээр ЕБС-ийн сурагчдад нөүтбүүк тараасныг харсан нэр дэвшигч нар аймаг, орон нутагтаа ингэж болно хэмээн санааг авч, даруй 2012 оны УИХ-ын сонгуулиар ийм ажил “компанит” болон өрнөсөн түүхтэй. 

Лав л одоогийн ССАЖЯ-ны Төрийн нарийн бичгийн дарга П.Алтангэрэл Дорнодын сургуулиудад Сингапураас авч ирсэн гэж хэлээд хужаа нөүтбүүк бэлэглэж, сонгуулиар оноогоо өсгөж байсныг санах юм. 

Тэгвэл алс тэртээх Алтай нутагт УИХ-ын гишүүн, МАН-аас нэр дэвшигч Ц.Дашдорж сумдын бүх сургуулиудын багш нарт зурган дээрхи BAZ нэрийн хужаа бага оврын нөүтбүүкүүдийг тараажээ. Дэвтэр шиг жижигхэн, хүн харахад нөүтбүүк шиг энэ эд тухайн үедээ багш нарт гайгүй таалагдаж, түүнийг их хуралд суудал авахад ч багагүй нөлөөгөө үзүүлсэн. 

Гэвч өдгөө сургуулиудад олон арваараа эвдэрсэн энэ нөүтбүүкүүд завсар авах нь бүү хэл хаяж болдоггүй, ашиглая гэхээр ашиглаж болдоггүй, дэмий л няравын өрөө, шкафанд хураагдчихсан, тооллого хийх үеэр тоологдоод өнгөрдөг нөүтбүүк нэртэй овоороод хэвтэж байгаа аж. Сургууль бүрт 15-20 ширхэгийг тараасан гээд бодохоор өөрийн мөнгө ч бай, эсвэл гишүүдийн тойрогтоо зарцуулдаг мөнгө ч бай чамгүй хэдэн төгрөг зарцуулсан болох нь мэдээж. 

Нэг ийм маягаар л гишүүн болчихсон түүнийг 2016 оны сонгуулиар дахин битгий Хятадын эдийн засгийг дэмжсэн, авч болдоггүй, хаяж болдоггүй хог тараагаасай билээ хэмээн хөдөөгийн багш нар бухимдаж сууна лээ.