Уулзалтын үеэр нэр дэвшигч Ц.Элбэгдорж багш нарт хандан "Улсын сайн хүнээсээ, хүний сайн хүүхдээсээ, хүүхдийн сайн багшаас ихээхэн хамааралтай" хэмээн багш мэргэжил хичнээн хариуцлагатай чухал болохыг онцолсон юм. Ирээдүйн монголыг авч явах иргэдэд боловсрол олгож буй багшийн мэдлэг ур чадварыг дээшлүүлэх, тэднийг гадны улс оронд сургах, туршлага судлуулах, цахим эрин зуунд цаастай ноцолдож консфэкт бэлддэг хуучин арга барилаас салгаж цахим ертөнцтэй холбоно. Багш хөтөлөбөрийг жинхэнэ утгаар нь хэрэгжүүлж багш нарыг чадавхжуулахын зэрэгцээ төрөөс гурван үе шаттай хэрэгжүүлэх орон сууцны хөтөлбөрт багш нарыг хамруулах тал дээр тусгайлан анхаарч бодлого хэрэгжүүлнэ. Багшийн сургалтын хэрэглэгдэхүүнд анхаарч төсөвт суулгана. Түүнчлэн сургууль, цэцэрлэгийн тоог нэмж дунд ахлах ангийг ээлжийн багштай, бага ангийн багшийг туслах багштай болгож нэг багшид ногдох ачааллыг багасгаснаар сургалтын чанарт ахиц гарна. Түүнчлэн " Туршлага гэдэг бол баялаг, туршлага гэдэг бол боловсрол. Тийм учраас багш нарыг улстөрийн халаа сэлгээгээр хэн нэгэн нөхөр ганцаараа дуран мэдэн халж сольдгийг болиулна. Хамт олноороо хэлэлцэж асуудлыг шийддэг байх болно" гэлээ.

 

 

Харин уулзалтад оролцсон багш нарын зүгээс төр засгаас эрдэмтдийн бүтээлийг дэмжих, хувийн сургуулийн статусыг тодорхой болгож өгөх, дэлхийд танигдсан давуу байдлаа ашиглан багш нарыг гадны улс оронд туршлага судлуулах, сургах асуудлыг шийдэж өгөхийг хүссэн юм. Мөн залуу багш нар "Дэлхийн энгээр тарсан охид хөвгүүдээ Монголдоо ирж ажиллахыг уриалж элэг бүтэн болгосонд талархдаг шүү Ерөнхийлөгчөө" гэсэн юм.

Мөн энэ үеэр Нийслэлийн ИТХ-ын дарга Д.Баттулга "Энэ жил 33 цэцэрлэг, 25 бага сургууль баригдана. Энэ бол түүхэнд байгаагүй тоо, ирэх 4 жилд 80 бага сургууль барина. Түүний бүтээн байгуулалтын ихэнх нь энэ жил хийгдэнэ" гэлээ.

Уулзалтын төгсгөлд нэр дэвшигч Ц.Элбэгдорж "Сонгуульдаа оролцоорой боловсролын системийнхээ төлөө, хэн нь бидний хүүхдэд хэрэгтэй вэ гэдгээ бодож сонголтоо хийгээрэй" гэсэг юм.