Ардчилсан намаас нэр дэвшигч Ц.Элбэгдоржийн сонгуулийн сурталчилгааны хаалт боллоо

Монгол Улсын Ерөнхийлөгчийн сонгуульд Ардчилсан намаас нэр дэвшигч Ц.Элбэгдоржийн сонгуулийн сурталчилгааны хаалт өнөөдөр Сүхбаатарын талбайд боллоо.
Наран ургах Дорнын их талаас эхэлсэн нэр дэвшигч Ц.Элбэгдоржийн сурталчилгааны ажил Монгол Улсаа нар зөв тойрон үргэлжилж, иргэд сонгогчидтойгоо 160 гаруй уулзалт хийгээдэх орныхоо зүрхэн тольт болсон Сүхийн талбайд ийнхүү өндөрлөлөө. Түүний сонгуулийн сурталчилгааны хаалтад оролцогчид Сүхбаатарын талбай дүүрэн цугларсан байв. Тэртээ 1990 онд хуучин нийгмийг халж, ардчиллын салхийг Монгол орондоо сэвэлзүүлэх гэсэн олон түмэн нийслэлийн төв талбайг хальтал цуглаж байсан бол өнөөдөр ч ардчиллын алтан хараацайнуудын нэг, Монгол Улсын ардчилсан Ерөнхийлөгчөө сонгуульд дахин дэмжихээр Сүхийн талбайг бүрхсэн юм. Барагцаалсан тоогоор Сүхийн талбайд 110 гаруй мянган хүн ирсэн байлаа. 1990 оны цагаан морин жилийн дүн өвлөөр ардчиллын төлөөх жагсаал цуглаан өрнөж байснаас хойш ингэж нэгэн дор улстөрийн сонгуулийн сурталчилгааны хаалтад ийм олноороо цугларсан нь анхных байлаа.
 
 
 
 
 
 
Төрийн ордны өмнө Монгол Улсын төрийн далбаа, Монгол Улсын Ерөнхийлөгчийн сонгуульд Ардчилсан намаас нэр дэвшигч Ц.Элбэгдоржийг дэмжин сонгуульд нэгэн баг болж оролцож буй Ардчилсан нам, ИЗНН, МҮАН, БНН, Эх орон намуудын тугийг залсан байв. Чингисийн хөшөөний өмнө зассан суудалд Монгол Улсын Ерөнхийлөгчийн сонгуульд Ардчилсан намаас нэр дэвшигч Ц.Элбэгдорж, УИХ-ын дарга З.Энхболд, Монгол Улсын Ерөнхий сайд, Ардчилсан намын дарга Н.Алтанхуяг, УИХ-ын гишүүн, Байгаль орчин, ногоон хөгжлийн сайд, ИЗНН-ын дарга С.Оюун, Ерөнхий сайд асан, МҮАН-ын дарга М.Энхсайхан, Нийслэлийн Засаг дарга бөгөөд Улаанбаатар хотын захирагч Э.Бат-Үүл, АН-ын Ерөнхий нарийн бичгийн дарга Ц.Оюундарь, ардын уран зохиолч П.Бадарч нар Ардчилсан Ерөнхийлөгчөө дэмжин үг хэллээ. Түүнчлэн АН-тай сонгуульд хамтарч буй намуудын төлөөлөл, ахмадууд индэрт суусан байв.
 
Авлигачид орох газаргүй боллоо
Сурталчилгааны хаалтын ажиллагааг нээж Монгол Улсын Ерөнхий сайд, Ардчилсан намын дарга Н.Алтанхуяг хэлсэн үгэндээ “Ардчилсан хувьсгал ялснаас хойш 24 жилийн дараа Сүхбаатарын талбай маань олон хүнээр дахин дүүрснийг хараад баярлаж бахархаж байна. Эзэн Чингис богдынхоо сүрлэг хөшөөний өмнө олон мянган сонгогчоо цугларсныг хараад бахархаж байна. 1990 онд өвлийн хүйтнийг үл ажран ардчиллын төлөө иргэд ингэж Сүхбаатарын талбайд цуглардаг байсан. 24 жилийн дараа ардчилсан Ерөнхийлөгчөө сонгуульд дахин дэмжихээр дүүрэн цуглараад байна. Сайхан эх орондоо хүн шиг амьдарч, улсаа улс шиг хөгжүүлэхийн төлөө ардчилсан Ерөнхийлөгчөө дэмжье. Монгол Улсын Ерөнхийлөгч Ц.Элбэгдорж өнгөрсөн дөрвөн жилд улс орондоо шударга ёс тогтоох, архидалт, авлигатай тэмцэх, шүүхийг нээлттэй, шударга болгохын төлөө амжилттай ажилласан. Энэ ажлыг цаашид гүнзгийрүүлэн хөгжүүлэхийн төлөө түүнийг дахин сонгож ажиллуулах ёстой. Ерөнхийлөгч, УИХ, Засгийн газар нэг зүгт харж ажилласан өнгөрсөн аравхан сарын хугацаанд хийсэн ажлын анхны үр дүн гарч байна” гээд гурван зүйлийг жишээ болгон хэллээ.
“Өнгөрсөн 10 сарын хугацаанд ард түмнийхээ ахуй амьжиргааг өөд татахаар ажиллаж юмны үнэ өсдөг биш тогтвортой байдаг, бүр буурдгийг харууллаа. Хээл хахууль, авлигатай хийх тэмцэл өнөөдөр ч үргэлжилж байна. Ард түмний халааснаас мөнгө завшсан авлигачид орох газаргүй болж байна. Ганц авлигачийн халааснаас 20 цэцэрлэг барих мөнгө гарч байна. Төрийн түшмэдээс үл хамаардаг төрийн үйлчилгээний цахим машин 14-ийг суурилууллаа. Намар гэхэд 120-ийг суурилуулна. Том бүтээн байгуулалт эхэлж байна. Монгол Улс өөрийн гэсэн онгоц, бензинтэй болж байна. Өөрийн юмтай болох цаг ирж байна. Аймаг бүрийг эмчилгээ, оношлогооны төвтэй болгоно. Бүх аймгийг нийслэлтэй хатуу хучилттай замаар холбоно. Цахилгаан станцууд босгоно. Төмөр замаа шинэчилнэ.
Бид “Өрсөлдөгчөө муулахгүй, өөрийгөө өмөөрөхгүй” гэсэн уриагаа хэрэгжүүлж ажилласан. Сонгуульдаа ардчилсан Ерөнхийлөгчөө дэмжье” гэлээ.
 
2040 онд Улаанбаатарт олимпийн наадам болно
 
Нийслэлийн Засаг дарга бөгөөд Улаанбаатар хотын захирагч, нийслэлийн сонгуулийн штабын дарга Э.Бат-Үүл1990 оноос хойш Сүхийн талбай иргэдээр дахин дүүрснийг хараад самсаа шархирч байна гэсэн юм. Түүнийг Нийслэлийн Засаг дарга болмогц Монгол Улсын Ерөнхийлөгч өрөөндөө дуудаж аваачаад өгсөн үүрэг дааалгаврын хамгийн том нь газрын наймаа, авлигаар авлигачдын халаасанд орсон мөнгийг эргүүлэн олж авах тухай байжээ. Тооцож үзэхэд нэг жилд 290 гаруй тэрбум төгрөгийн хөрөнгө авлигачдын халаасанд орсон байсныг тогтоосон байна. 180 гаруй цэцэрлэг, бага сургуулийн цогцолбор барих мөнгө авлигачдад алдагдсан байсныг эргүүлэн авч байгаа шүү гэдгийг тэрээр Монгол Улсын Ерөнхийлөгчид дуулгалаа.
 
 
 
Төсөв хөрөнгө авлигачдын гарт орохоо больсноор монголчууд асар богино хугацаанд маш их ажил амжуулж байгааг гадныхан хүртэл гайхах болжээ. 2040 он гэхэд Улаанбаатарт олимпийн наадам зохион байгуулах санамж бичигт гарын үсэг зурж Улаанбаатар хөгжиж дэвжин олимпод хүрэх хүсэл мөрөөдөлтэй болсныг Э.Бат-Үүл дарга иргэд сонгогчдод ам бардам хэлж байлаа.
 
Би ард түмний өсгөсөн хүү
 
Монгол Улсын Ерөнхийлөгчийн сонгуульд Ардчилсан намаас нэр дэвшигч Ц.Элбэгдорж сонгуулийн сурталчилгааныхаа хаалтын ёслол дээр хэлсэн үгэндээ “Би аав, ээжийнхээ өврөөс гараад ард түмнийхээ өвөрт орсон юм. 1990 онд цэрэг шинелээ тайлаад Сүхбаатарын талбай дээр ард түмнийхээ дунд ардчилсан хувьсгал руу орсон. 1990 онд ард түмэнтэйгээ хамтдаа цуглаж, жагсч, 1990-1992 онд картын бараанд хамтдаа дугаарлаж явсан. Би та бүхний өсгөсөн хүү. Та бүхний өсгөсөн хүүгийн ёсоор та бүхний төлөө зүтгэнэ. Хийж амжаагүй ажлаа гүйцээж хийх боломж тохиож байна. Энэ сайхан боломжийг алдах ёсгүй.
 
 
 
 
Богд хаан 100 жилийн өмнө автомашин оруулж ирээд шатахуунаа гаднаас авч байсан. Одоо ч гаднаас авч байна. Саяхнаас Монголоос олборлосон газрын тосоор гадаадад үйлдвэрлэсэн шатахуун оруулж ирдэг боллоо. Одоо тэгвэл шатахуунаа өөрсдөө хийнэ. Гадаад орнуудад нүүрснээс бензин гаргаж авч байна. Монгол Улс нүүрсний асар их баялагтай. Үүнээсээ шатахуун гаргадаг болъё. Монгол Улс өөрийгөө хямд цахилгаанаар хангах боломжтой. Гаднынхан Монголыг эрчим хүчний диваажин байж болох газар гэдэг.
 
Төмөр замаа шинэчилнэ. Жараад жилийн өмнө байгуулагдсан өвгөн төмөр зам жилд 19 сая тонн ачаа тээж байна. Үүнийг 100-200 сая тонн болтол нэмэгдүүлэх шинэ төмөр замтай болно. Монголын гадаад нэр хүнд өссөний ачаар өнгөрсөн оны сүүлээр 1,5 тэрбум ам.долларын “Чингис бонд” босгож, бүтээн байгуулалтад зарцуулах мөнгөтэй боллоо. Мөнгө зээлүүлнэ гэдэг хамгийн том итгэл байдаг” гээд ирэх дөрвөн жилд ард иргэддээ эрхийг нь өгч, авлигатай тэмцэж, Монголын нэрийг олон улсад сайнаар гаргахын төлөө үргэлжлүүлэн ажиллаж Монгол Улсынхаа төлөө зүтгэнэ. Иргэдээ ядарч явахад нь хажууд нь байдаг Ерөнхийлөгч байх болно гэдгээ хэлэв.
 
 
Авлигатай цаашид тэмцэж эхчүүд, хүүхдүүд, залуус, ахмадуудаа төрд төлөөлөн ажиллаж тэдний төлөө хийх мөрийн хөтөлбөрийн амлалтуудаасаа танилцууллаа.Тэрээр орон нутагт шууд ардчилал хөгжүүлж төсвийн хөрөнгийг зарцуулах эрх мэдлийг иргэдэд олгосныг, орон сууцны зээлд ажил хийж, цалин авч байгаа хүн бүр хамрагдах боломж нээгдсэнийг, ахмадууд, залуу гэр бүлүүд төрийн мэдлийн орон сууцанд аж төрөх боломж бүрдэж буйг танилцуулаад ойрын үед 80 бага сургууль нэмж байгуулах, хүүхдээ харж буй ээжүүдээс бололцоотой нь хөршүүдийнхээ хүүхдийг давхар харж цалинжих, үүгээрээ бас цэцэрлэгийн асуудлыг шийдэх, залуу ээж нарт хүүхдийг нь хоёр ой хүртэл тэтгэмж олгох, гурав дахь, дөрөв дэх хүүхдээ төрүүлбэл энэ тэтгэмжийг 40 хувь нэмж олгох зэрэг олон асуудлыг хөндөн ярилаа.
“Та бүхэн намайг зургадугаар сарын 26-ны өдөр дэмжээрэй. Би та бүхнийг дараагийн дөрвөн жилийн турш дэмжих болно. Зургадугаар сарын 27-ны морин цагт та бүхний ялалт, амжилтыг хуваалцах болно. Сайхан Монгол орныхоо төлөө хамтдаа зүтгэе” гэснээр Монгол Улсын Ерөнхийлөгчийн сонгуульд Ардчилсан намаас нэр дэвшигч Ц.Элбэгдоржийн сонгуулийн сурталчилгааны хаалтын ёслол өндөрлөв.
Сүхбаатарын талбай дүүрэн цугларсан сонгогчид сонгуулийн өдөр түүнийг дэмжин саналаа өгөхөө илэрхийлэн уухайн түрлэг хадааж байлаа. Хаалтын арга хэмжээтэй давхцан бороо зөөлөн шивэрч эхэлсэнд цугласан олон "Хуртай хүн хур борооноор, тэнгэр хангай хүртэл хураа хайрлаж байна" хэмээн ихэд бэлэгшээж байсан юм.
Өнөөдрөөс сайхан маргааш ирнэ, өнгөрснөөс илүү сайхан зун болж байна...
                                                                                     Д.ОЮУН