УИХ-ын гишүүн Б.Чойжилсүрэн өчигдөр “Dorgio.mn сайтын нийтэлсэн Б.Чойжилсүрэнгийн компанийг хүн амины хэрэгт сэжиглэж болохоор байна" гэсэн гарчигтай нийтлэл худлаа, манайх шүүхээр орж, маргасан зүйл байхгүй” хэмээн хэвлэлийнхэнд мэдээлэл хийсэн билээ. Тэгвэл шүүхээр орсон эсэхийг нь нэхэн сурвалжилахад ийм байна.

Б.Чойжилсүрэнгийн 50 хувь эзэмшлийн компани болох “Саус гоби коэл транс”-нь Тост, Тосонбумбын нуруунд нүүрс олборлох ашиглалтын тусгай эрхтэй цорын ганц компани болохыг бид өмнө нь мэдээлж байсан билээ.Тэгвэл тэднийх цорын ганц байсан ашиглалтын лицензээ хоёр болгоод үржүүлчихжээ. Тодруулбал 2012 онд 30773,24 га талбайд нүүрс олборлох эрхийг Ашигт малтмалын газраас авсан байдаг. Энэ нь 2042 он хүртэл олборлолт явуулах эрхтэй юм. Тиймээс үүнийг эсэргүүцсэн нутгийн иргэд өнгөрсөн хавраас эхлэн Б.Чойжилсүрэнгийн компанийг шүүхэд өгсөн боловч, шүүх хурал болоход нутгийн иргэд ялагдаж, Саус Гоби Коэл Транс ашиглалтын тусгай зөвшөөрлөө хадгалж үлдсэн байна. Харин үүний дараа буюу 2015 онд 2045 он хүртэл дахин нэг ашиглалтын лиценз авчихсан байгаа учир Өмнөговь аймгийн иргэдийн төлөөлөгчдийн хурлаас Б.Чойжилсүрэнгийн компанийг дахин шүүхэд өгсөн аж. Энэ хэрэг шийдэгдээгүй, бөгөөд одоогоор маргаантай байгаа байгаа юм байна.

Энэ талаар “Тост” төрийн бус байгууллагын тэргүүн Сүрэнхүүгээс тодруулахад “Уг нь Б.Чойжилсүрэнгийн компани Тостын нуруунд ганцхан зөвшөөрөлтэй байсан чинь хоёр ашиглалтын лиценз болгочихсон байна. “Саус гоби сэндс” компаниас тэр эрхийг худалдаж авсан юм уу, эсвэл нэг зөвшөөрлөө хоёр болгоод хуваачихсан юм уу. Ойлгомжгүй байгаа. Ямар ч байсан үргэлжилсэн, нэг дор байгаа талбайд хоёр А лицензийг Б.Чойжилсүрэнгийн компани эзэмшсэн байгаа. Сүүлд гарч ирсэн тэр лицензтэй нь холбогдуулаад шүүхэд өгсөн. Шүүхийн шийдвэр гараагүй, маргаантай байгаа” гэлээ. Талийгаач Т.Лхагвасүмбэрэлийн ар гэрийнхэн болон ажлын хамт олон найз нөхөд нь түүний үхэлд Тост, Тосон бумбын нуруунд лицензтэй компаниудыг сэжиглэж байгаа юм билээ. Тэгвэл тэнд 18 лиценз байгаагаас, 17-нь хайгуулынх, 1-нь ашиглалтын лиценз байгаа юм. Цорын ганц ашиглалтын лиценз нь Б.Чойжилсүрэнгийн компани болох "Саус гоби коэл транс". Удаа дараа шүүхэд дуудагдаж, байгаа ч эднийх ашиглалтын зөвшөөрлөө хадгалж үлдэхийн төлөө зүтгэж байгаа ажээ.

...Үргэлжлэл бий

Н.Ганаа

Эх сурвалж: Cityinfo.mn