Гал усны гашуун зовлон гэж тодотгодог нь жирийн хэрэг биш ажээ. Дайраад ирэхэд гарах гарцгүй, барих барьцгүй гал усны аюул урин дулаан цагтай уралдан ирдэг. Хүмүүс халуун нарнаас зугтаж дайжихдаа, амарч цэнгэхдээ гол ус барааддаг нь эрсдэл дагуулсаар байна. ОБЕГ-т ч усанд осолдлоо, живлээ, усаар аялаад сураггүй алга боллоо гэсэн дуудлага өдөр бүр ирэх болжээ.

Аялалд гараад сураг алдарчээ

Идэрийн голоор усан аялал хийхээр Завхан аймгийн Идэр сумаас гараад сураг алдарсан гадаадын иргэнийг сар гаруйн хугацаанд эрэн хайгаад олоогүй байна. Швейцарийн холбооны улсын иргэн Б /69 настай, эрэгтэй/ энэ оны тавдугаар сарын 24-ны өдөр завьтай аялалд гараад, хамгийн сүүлд Хөвсгөл аймгийн Төмөрбулаг сумын “Олон голын бэлчир” гэдэг газар Сэлэнгэ мөрөнд зургадугаар сарын 10-ны өдөр явж байснаас хойш сураггүй болсон юм. Түүнийг Хөвсгөл, Булган, Сэлэнгэ аймгийн нутаг Идэр, Сэлэнгэ, Орхон мөрний дагуу хайсан ч ямар ч сураг гараагүй байна. Аймгуудын ОБГ-ууд Орос Монголын хил хүртэл нийтдээ 325 км газарт эрж хайгаад олоогүй тул зургадугаар сарын 30-ны өдөр эрлиг зогсоосон байна.

Усанд осолдсон залуусын цогцос олдсонгүй

Гол мөрний усанд осолдож эндсэн хүмүүсийн олонх нь залуус ажээ. Өнгөрсөн арав хоногт л гэхэд хэд хэдэн залуучууд усанд живж өөд болжээ.Сэлэнгэ аймгийн Орхонтуул сумын Шар-Ус багийн “Хонхор”-ын задгайд оршин суугч иргэн Н /21 настай, эрэгтэй/ тус багийн “Суу толгой” гэдэг газар Орхон голын усанд осолдсон ч шарил нь олдоогүй тухай ОБЕГ-ын албан сайтад мэдээлжээ. Сэлэнгэ аймгийн ОБГ-ын 11 албан хаагч, Цагдаагийн байгууллагын хоёр албан хаагч, орон нутгийн 43 иргэн, нийт 60 хүн зургадугаар сарын 25-30-ны өдрүүдэд усанд эндсэн залууг эрж хайгаад олоогүй гэнэ. Шар-Ус багийн Орхоны гүүрнээс, Хушаатын гүүр хүртэл 150 км, Суу толгой гэдэг газраас Хар хошуу гэдэг газар хүртэл усаар 80 км, Суу толгойгоос-Орхоны гүүр хүртэл 80 км нийт 310 км газарт самналт хийгээд олоогүй тул эрлийг зогсоожээ. Мөн Хөвсгөл аймгийн Ренчинлхүмбэ сумын Хөндий багийн “Хар-Ус” гэдэг газар /сумын төвөөс хойд зүгт 25 км/ тус аймгийн Алаг-Эрдэнэ сумын харьяат иргэн Н /24 настай, эмэгтэй/ зургадугаар сарын 27-ны өдрийн 14:30 цагт Шишгэдийн голын усанд осолдсон байна. Аврагчид голын усанд шумбалт хийн, голын хоёр захаар завьтай эрэл хийсэн ч усны гүн 4-9 метр, булингартай, харагдах орчин муу байсан тул талийгчийн шарилыг олоогүй гэнэ. Тиймээс эрлийг зогсоожээ.Завхан аймгийн Алдархаан сумын Богдын гол багийн нутагт иргэн М /35 настай, эрэгтэй/ “Тээг толгой” усан цахилгаан станцын хясаанаас хүрхээний ус руу унаж өөд болжээ.

Хүүхдүүд тогтоол усанд осолджээ

Өвөрхангай аймгийн Тарагт сумын Туяа багийн нутаг /аймгийн төвөөс 30 км/ “Хар адуу” гэдэг газар тогтоол усанд хүүхдүүд осолдсон хэрэг гарчээ. Аврагч нар усанд осолдсон Д /4 настай, эрэгтэй/, Д /6 настай, эмэгтэй/, Г /10 настай, эрэгтэй/-н цогцосыг уснаас гаргаж, Цагдаагийн байгууллагад тус тус шилжүүлэн өгсөн.

Үер, ус, шаварт саатсан дуудлага тасрахгүй байна

Завхан аймгийн Улиастай сумын Чигэстэй багийн “Солоон”-ы амны гарам Чигэстэй голын усанд 10-22 ЗАН улсын дугаартай автомашин урсах гээд байна гэсэн дуудлагыг 2016.06.30-ны өдрийн 10:58 цагт хүлээн авч тус аймгийн Онцгой байдлын газрын 5 албан хаагч ажиллаж 5 зорчигчтой зорчиж явсан иргэн Б-гийн эзэмшлийн “Suboru poristor” загварын автомашинийг уснаас татан гаргаж;

Архангай аймгийн Эрдэнэбулган сумын 6 дугаар багийн нутаг дэвсгэрт үйл ажиллагаа явуулдаг “Шивэрт” амралтын хажууд 19-22 АРХ улсын дугаартай автомашин шаварт суусан тухай дуудлагыг 2016.06.30-ны өдрийн 08:30 цагт /хүлээн авч тус аймгийн Онцгой байдлын газрын 2 албан хаагч ажиллаж 8 зорчигчтой зорчиж явсан иргэн Б-гийн эзэмшлийн “Истана” загварын автомашинийг уснаас татан гаргаж;

Ховд аймгийн Булган сумын Байтаг багийн доод нарийний аманд Булган голд 79-88 ХОА улсын дугаартай автомашинтай суусан тухай дуудлагыг 2016.06.30-ны өдрийн 15:30 цагт хүлээн авч тус аймгийн Онцгой байдлын газрын 4 албан хаагч ажиллаж 8 зорчигчтой зорчиж явсан иргэн Б-гийн эзэмшлийн “УАЗ-469” загварын автомашинийг уснаас татан гаргаж;

Завхан аймаг Тэс сумын Зүр багийн Тэсийн голын усанд 97-52 УНХ улсын дугаартай суудлын автомашин усанд суусан тухай дуудлагыг 2016.06.30-ны өдрийн 19:45 цагт хүлээн авч тус аймгийн Онцгой байдлын газрын 4 албан хаагч ажиллаж иргэн Г-гийн эзэмшлийн “Subaru impeeza” загварын автомашинийг уснаас татан гаргаж тус тус аюулгүй болгосон байна.

Өнгөрсөн 10 хоногийн хугацаанд л гэхэд гол усанд эндэх, живэх, машинтайгаа шаварт суух зэрэг олон хэрэг гарчээ. Энэ сард ч бороо олон жилийн дунджаас ахиу орно. Иймд иргэд гол усны аюулаас онцгойлон сэрэмжлэхийг ОБЕГ-аас анхаарууллаа.