Монголын чөлөөт бөхийн холбооныхон гар зөрүүлжээ. Энэ тухай Монголын чөлөөт бөхийн холбоо албан ёсны сайтдаа “Гавьяат тамирчин Ц.Цогтбаяр, Гавьяат дасгалжуулагч Ц.Хосбаяр, дасгалжуулагч Л.Энхбаяр нарын хэсэг дасгалжуулагчид, БХЯ-ны харьяа “Алдар” спорт хорооны тамирчид тухайлбал Гавьяат тамирчин Г.Мандахнаран, С.Цэрэнчимэд, олон улсын хэмжээний мастер П.Орхон, Б.Одончимэг, Э.Цэвэгмид нарын хорь гаруй хүн өчигдөр Спортын төв ордонд байрлах Монголын чөлөөт бөхийн холбооны албан өрөө, холбооны эд хөрөнгө, иргэний  эрх чөлөөнд халдлаа” хэмээжээ.

Цаашлаад ”МЧБХ-ны хурлын мандат олголт 14.00 цагаас эхлэхээр товлогдсон байсан боловч дээрх хүмүүс хурлын төлөөлөгчдийн мандат, хурлын материал зэргийг хүчээр булаан авч, ширээ сандал, компьютер, принтер зэрэг эд зүйлсийг эвдлэн бусниуллаа. Тэр дундаа Гавьяат тамирчин О.Пүрэвбаатар согтуугаар МЧБХ-ны албан өрөөнд орж хурлын төлөөлөгчдийн бүртгэлийг урж танхайрсан. Ийм нөхцөл байдлаас шалтгаалан холбооны хурлын төлөөлөгчдөд мандат олгох боломжгүй байдалд хүрээд байна” хэмээн хурлаа “BLUE SKY” зочид буудлын хоёрдугаар давхрын Хурлын танхимд болгон өөрчилснөө дурджээ.

amjilt.com