ЛОНДОН./Reuters/. Монголын гадаад худалдааны ашиг энэ оны эхний улиралд 2016 оны мөн үеийнхээс 45.5 хувиар өсөн 523.7 сая долларт хүрчээ.

Монголын Статистикийн ерөнхий газраас лхагва гарагт гаргасан тайланд дурдсанаар, нүүрсний нийлүүлэлт 446 хувиар, нийт ашигт малтмалын экспорт 58 хувиар өссөн нь гадаад худалдааны ашиг эрс нэмэгдэхэд нөлөөлсөн байна. Энэ оны эхний улиралд Монголын экспортод гаргасан нийт бүтээгдэхүүний 89.2 хувийг ашигт малтмал эзэлж байна.

2016 онд Монголын худалдааны ашиг өмнөх оныхоос 79 хувиар өсөн 1.56 тэрбум долларт хүрчээ.

Гадаадын хөрөнгө оруулалт татарч, ашигт малтмалын үнэ буурсны улмаас эдийн засгийн өсөлт нь саарч, төгрөгийн ханш суларснаар Монгол Улс хямралд орсон юм.

Бондын өрөө хугацаанд нь эргэн төлж чадахгүйд хүрч болзошгүй гэсэн түгшүүр нэмэгдэж байх үед тус улсын Засгийн газар Олон улсын валютын сан болон бусад түншээсээ 5.5 тэрбум долларын тусламж авах тохиролцоонд хүрсэн билээ.

Өмнөх Засгийн газар санхүүгийн түрэмгий бодлогууд хэрэгжүүлсний улмаас улс орны эдийн засгийг хямралд оруулсан гэж тус улсын эрх баригч МАН үзэж байна.

Татварыг нэмэгдүүлж, зардлыг танах төлөвлөгөө хэрэгжүүлж байгаа ч МАН зургадугаар сарын 26-нд болох ерөнхийлөгчийн сонгуульд ялах магадлал бусад намаас ялимгүй өндөр хувьтай байгааг олон нийтийн дунд санал асуулга явуулдаг “Сант Марал” сангийн энэ долоо хоногт гаргасан судалгааны тайлан харууллаа.

МАН Монголыг “зөв зүгт” чиглүүлж байна гэж санал асуулгад оролцогчдын 35.9 хувь нь  үзсэн бол “буруу зүгт” залж байна гэж 28.3 хувь нь хэлжээ.

Ерөнхийлөгчийн сонгуульд нэр дэвшигчдийн нэрс хараахан тодорхой болоогүй байна.

Ардчилсан намын гишүүн, одоогийн Ерөнхийлөгч Ц.Элбэгдорж хоёр удаа ерөнхийлөгчөөр сонгогдсон тул Үндсэн хуульд заасны дагуу дахин сонгуульд өрсөлдөх боломжгүй юм. /2017.04.12/

/ http://af.reuters.com/article/energyOilNews/idAFL3N1HK3RB/