Эрдэнэтийн ирээдүйн эзэд" байгалийн ухааны нэгдмэл агуулгын анхдугаар олимпиад Эрдэнэт хотод боллоо.  Олимпиад математик, физик, хими, биологи, газар зүй гэсэн таван  судлагдахууны нийлбэр агуулгаар зохион байгуулагдав. Засгийн Газрын Хэрэг Эрхлэх Газрын дэд дарга Б.Бат-Эрдэнийн санаачилгаар зохиогдсон тус олимпиадад Орхон аймгийн төрийн болон төрийн бус өмчийн 21 сургуулийн шилдэг 105 сурагч оролцож, мэдлэг, чадвараараа өрсөлджээ.
     Олимпиадын тэргүүн байруудыг Ш.Отгонбилэгийн нэрэмжит Технологийн сургуулийн   Ахлах сургуулийн 12-р ангийн сурагч С.Сувданчимэг, Т.Цэлмэг, А.Мөнхзаяа нар эзэлж, онцгой амжилт үзүүллээ. Мөн тус сургуулийн  12-р ангийн сурагч О.Мөнхзул долоодугаар байранд, сурагч Л.Энхмаа арван хоёр дугаар байранд тус тус шалгарчээ. Сургууль тус бүрээс оролцсон таван сурагчийн дундаж оноогоор шилдэг Заах аргын нэгдэл буюу сургуулийг шалгаруулсан бөгөөд Ахлах сургууль тэргүүн байр эзэлсэн байна.
     Технологийн сургуулийн Ахлах сургуулийн хамт олон энэ хичээлийн жилд амжилт арвин байна. Өнгөрсөн сард болсон Улсын төрөлжсөн олимпиадын II даваанд амжилттай оролцож, химийн олимпиадын 12-р ангийн төрөлд 12-р ангийн сурагч С.Сувданчимэг нэгдүгээр  байр эзэлж, улсын олимпиадад оролцох эрх, 12-р ангийн сурагч Т.Цэлмэг гуравдугаар байр, физикийн олимпиадын 12-р ангийн төрөлд 10-р ангийн сурагч Д.Тэмүүжин анги дэвшин оролцож түрүүлэн,  улсын олимпиадад оролцох эрхийн эзэн болжээ. Сэтгэх чадварын олимпиадын 10-р ангийн төрөлд 10-р ангийн сурагч Б.Ууганбаяр гуравдугаар байранд шалгарсан бол техник, технологийн олимпиадын нисэх загварын төрөлд 12-р ангийн сурагч Б.Шинэбаяр түрүүлж, улсын олимпиадад оролцох эрхээр шагнагдсан байна.
     Багш нарын олимпиадын төрөлд багш Э.Амарбаясгалан дэд байр, багш  С.Мэнджаргал, Д.Пүрэвсүрэн, И.Оюунтуяа нар гуравдугаар байр эзэлжээ.