Засгийн газрын ээлжит хуралдаан өнөөдөр болж, 2026 оныг боловсролыг дэмжих жил хэмээн зарласан байна. Энэ талаар Боловсролын сайд П.Наранбаяр мэдээлэл өглөө.

Тэрбээр "Засгийн газрын хуралдаанаас 2026 оныг боловсролыг дэмжих жил болгон зарласан чухал шийдвэр гаргалаа. Боловсрол бол ирээдүй, бүх зүйл хамаарч байдаг. 

Дэлхийн банкны хийсэн судалгааг харахад бид боловсролдоо хөрөнгө оруулж чадвал манай улсын эдийн засгийн өсөлт жилд 30 хувь хүрэхэд ойрхон байна. 2023 онд боловсролын багц хууль батлагдсан. Боловсролын багц хуулийг цаашид хэрэгжүүлэх, амилуулах, боловсролын тэгш хүртээмж, хүүхдийн сурах таатай орчныг бүрдүүлэхэд Засгийн газрын онцгой шийдвэр гаргаж байна. 

2026 оныг боловсролыг дэмжих жил болгосноор зургаан шинэчлэлийг төгөлдөржүүлнэ. Хөтөлбөр, үр дүнд суурилсан санхүүжилт, цахимын шинэчлэл, багшийн гурван тулгуурт бодлого, багшийг дэмжих бодлого, цахим шилжилтийг төгөлдөржүүлнэ. 

Хамгийн гол нь ерөнхий боловсролын сургууль, цэцэрлэгийн хүртээмжийг эрс нэмэгдүүлсэн, хөрөнгө оруулалтыг нэмсэн жил байх болно. Бидний хийсэн тооцооллоор 2030 он гэхэд манай улсад 88 мянган хүүхэд нэмэгдэхээр байгаа. Энэ хүүхдүүдэд зориулсан нийт 108 сургууль, 95 цэцэрлэг хэрэгтэй. Үүнд шаардагдах хүн амын нягтшилын тооцооллыг тусгай программд оруулж байршуулсан. Энэ тооцоололд үндэслэж төсвийг зарцуулна. 

Төсвийн хөрөнгө оруулалтыг сургууль цэцэрлэг барьж байгуулах, багшийг хөгжүүлэх болон дутагдлаас гаргахад түлхүү зарцуулж эхэлнэ. Засгийн газраас зарласан 14 мега төслийг хэрэгжүүлэхэд хүний нөөцийн дутагдал үүссэн. Хүний нөөцийн дутагдлыг арилгахад боловсролын бодлого шууд чиглэнэ. 

Боловсролыг дэмжих жил нь Монгол Улсын ирээдүйг дэмжих жил болж эхэлнэ. Мөн эдийн засгийг дэмжих, салбар дундын уялдаа холбоог хангах, салбарын үзүүлэлтийг сайжруулах үндсэн шинэчлэл байх болно" хэмээн мэдээлэв.