“МАХН-ын дарга Н.Энхбаярыг АТГ-ын ажилтнууд баривчлах гэж байна” гэсэн мэдээлэл өчигдөр тарсан. Н.Энхбаярын эхнэр О.Цолмон энэ үйл явдалд өөрийн байр сууриа илэрхийлж, мэдээллийн сайтуудад ярилцлага өгсөн байна.

Тэрээр “Авлигатай тэмцэх газрыг хууль хяналтын байгууллага гэж хэлэхэд хэцүү болжээ. Манай гэр бүлийнхэн болоод бусад хүмүүс ингэж хэлэх байх. 2012 онд анх баривчилгаа хийхдээ л хууль зөрчиж эхэлсэн. Дөрвөн жилийн хугацаанд энэ байгууллага хууль зөрчиж байна. Намын байран дээр болсон үйл явдалд манай хуульчид үнэхээр гайхаж байна. Түрэмгийлэл, дээрэм хийж байгаа бүлэглэл шиг авирласан. Хуулийн байгууллага өөрөө хуулиа чанд сахиж байж, бусад иргэд ард түмэн, албан байгууллагаасаа хуулийн дагуу ажиллахыг шаардах ёстой. Би их гайхаж байна.“Авлигатай тэмцэх газар”-т үнэхээр сэтгэцийн өвчтэй хүмүүс ажилладаг юмуу, эсвэл үнэхээр дарамтад орсон, ямар ч зүйлийг бодохгүй хий гэсэн болгоныг биелүүлдэг хүмүүс байгаа юмуу. Яагаад ичдэггүй юм бол. Монгол гэх тодотголтой Монгол Улсынхаа хуулийг захиалгаар зөрчөөд явах юм. Их л сайхан зүйл хийж, бүтээж явна гэж боддог байх даа. Хууль хяналтын байгууллагын нэр хүндийг унагааж, уландаа гишгэж байгаа байгууллага бол “Авлигатай тэмцэх газар” боллоо. Би сайтуудын мэдээллийг уншлаа. Дөрвөн өмгөөлөгч байгаа юм. Тэдгээр өмгөөлөгчдийн нэг нь ч Н.Энхбаярт хандсан тохиолдол алга байна. Тэгсэн мөртлөө “Авлигатай тэмцэх газар”-ын мөрдөн байцаагчидтай өмгөөлөгч орж ирлээ. Өмгөөлөгчид нь байнга л хууль зөрчинө, угаасаа АТГ-ын өмгөөлөгчид байх гэж бодож байна. Өмгөөлөх биш, АТГ-ын хүмүүстэй хамтарч Н.Энхбаярыг руу дайрсаар байгаад гарцгаасан. Б.Оюунбилэг өмгөөлөгч дөрвөн жил өмгөөлж явна, байнга л түүнийг үл тоомсорлодог. АТГ өөрсдийн бүлгэмийн хүмүүсээ буруу зүйл ярьж байсан ч гэсэн зөв болгож чаддаг улс шүү дээ. Харин манай талаас бүх баримтыг гаргаж, гэрч нь хүртэл нотлоод байхад буруу л болчихдог. Н.Энхбаярыг шоронд хийх үйлдэл харшлах л юм бол 100 хувийн буруу тохож орхино. Тиймээс манай өмгөөлөгч гараад ямар ч нэмэргүй байдаг юм. Үнэхээр Н.Энхбаяр хууль зөрчөөд, авлига авч, маш ноцтой зүйл болсон бол өөр хэрэг. Гэтэл холбогдох хэрэг алга. Зохиомол хэрэг гэдэг нь тодорхой байна. Энгийн хүн хараад ч хууль зөрчиж байна гэдгийг ойлгоно. Манай оронд хууль үйлчлэхгүй байна. Хуулийг түрэмгийлэл гэмгүй хүмүүсийг оролддог болсон байна” гэж ярьжээ.