Хуурамч фэйсбүүк хаяг үүсгэж охид, эмэгтэйчүүдийн хувийн мэдээллийг нь цуглуулж, хэсэг хугацааны дараа олон нийтийн сүлжээгээр тараана хэмээн айлган сүрдүүлж их хэмжээний мөнгө авдаг бүлэглэл хэд хэдээрээ бий болсон байна. Эрүүгийн цагдаагийн газрын Цахим гэмт хэрэгтэй тэмцэх хэлтэст зүй бус сүрдүүлгийн шинжтэй 20 хэргийг шалгаж байгаа аж. Ийм төрлийн гэмт хэргийн хохирогчид нь шилжилтийн насны охид, залуу бүсгүйчүүд байдаг гэнэ. Энэ талаар албаны эх сурвалжаас авсан мэдээллээр гэмт этгээдүүд амьдралын боломжтой охидтой хуурамч фэйсбүүк хаягаар дамжуулан танилцаж, олон сарын турш харилцдаг байна. Утсаар ярьж, фэйсбүүкээр байнга харилцдаг гэнэ. Бүр бэлэг хүргэлтийн үйлчилгээгээр цэцэг, бэлэг дурсгал явуулдаг аж. Ингэж итгэлийг нь олсны дараа охидын хувь хүний нууцад хамаарах мэдээлэл болон нүцгэн зургийг нь олж авдаг аж. Үүнийхээ дараа “Чиний тийм нүцгэн зураг байна. Энэ зургийг чинь олон нийтийн сүлжээнд тавилаа. Гурав хоногийн дотор бидний хэлсэн мөнгийг өгөх юм бол зургийг чинь тавихгүй. Нүцгэн зураг чинь цахим ертөнцөд цацагдах юм бол сургуулиар чинь дүүрэн яриа болно. Аав, ээж чинь мэднэ. Хамаатан садангийнхаа нүүрийг яаж харах юм бэ. Цагдаад хэлээд нэмэргүй шүү. Зураг олон нийтэд хүрчихсэн хойно цагдаа нар шалгаад юу ч хожихгүй” хэмээн дарамталдаг байна. Ингээд хохирогчид гэмт хэрэгтнүүдийн хэлсэн мөнгийг олж өгдөг аж. Үүнээс болоод гэрээсээ хулгай хийх, ах, эгч, хамаатан садандаа худлаа хэлж их хэмжээний мөнгө авсан тохиолдол ч цөөнгүй гарчээ. Хамгийн сүүлд гэхэд эрхэлсэн тодорхой ажилгүй М, Б нар нь хуурамч хаяг үүсгэж, иргэдтэй танилцаж, дотносох замаар хувийн мэдээлэл, видео бичлэгийг нь цуглуулсан байна. Зургаан иргэний хувийн мэдээллийг олон нийт болон найз нөхдөд нь тараана хэмээн сүрдүүлж их хэмжээний мөнгө авсан болохыг цагдаагийн байгууллага илрүүлэн тогтоожээ. Дээрх хэргийг бүлэглэн үйлдэж байсныг таслан зогсоож Чингэлтэй дүүргийн цагдаагийн нэгдүгээр хэлтэст эрүүгийн хэрэг үүсгэн шалгаж байна.

Нөхөртэй эмэгтэйчүүд гэмт хэргийн золиос болдог гэнэ

Өсвөр насны охидоос гадна бүсгүйчүүдийг урхиндаа оруулж их хэмжээний мөнгө авдаг бүлэглэл бий болоод байгаа гэнэ. Нөхөртэй болон ганц бие бүсгүйчүүд дээрх хэргийн бас нэгэн гол золиос болдог байна. Нөхөртэйгөө суугаад таваас дээш жил хамтран амьдарч байгаа эмэгтэйчүүдийг тэд ихэвчлэн судалдаг аж. Ихэнх эмэгтэй фэйсбүүк хуудсан дээрээ нөхөртэйгөө хэдэн жил амьдарч байгаа талаарх болон бусад мэдээллээ оруулсан байдаг аж. Ихэнх тохиолдолд бүсгүйчүүд хуурамч фэйсбүүк хаяг үүсгэж бусадтай танилцдаг гэнэ. Гэмт этгээдүүд хэсэг хугацаанд ойр дотно яриа өрнүүлж байгаад дарамталж эхэлдэг байна. Тэд “Чиний бичсэн эдгээр зүйлсийг нөхөр рүү чинь явууллаа. Мөн хадам талын хүмүүст илгээнэ. Вэб сайтуудаар байршуулна” хэмээн сүрдүүлж эхэлдэг. Ингээд мөнгө авдаг байна. Ганц бие бүсгүйчүүдийг мөн л нүцгэн болоод хагас нүцгэн зургийг дотно танилцаж байхдаа авч дарамталдаг гэнэ. Охид, эмэгтэйчүүдийг энэ хэлбэрээр айлган сүрдүүлж, дарамталж мөнгө нэхдэг гэмт хэрэгтнүүдийн тоо эрс нэмэгдэх болжээ. Гэмт этгээдүүд хуурамч хаяг дээрээ маш олон хүнтэй зэрэг харилцдаг нь тогтоогдоод байгаа аж. Тухайлбал, Б гэгч нь 50 гаруй эмэгтэйтэй байнгын харилцдаг байсныг мөрдөн байцаалтаар тогтоосон байна.

16 настай Сгэгчид охид, эмэгтэйчүүдийн мянга гаруй зураг хадгалагдаж байжээ

Фэйсбүүк хуудсаар танилцан харилцаж, улмаар тэдний итгэлийг олж аван, хувийн мэдээлэл цуглуулж, бусдыг дарамталдаг нэгэн гэмт этгээдийг цагдаа нар барьжээ. Гэмт этгээд 16 настай Сгэгч байсан гэнэ. Тэр охид, эмэгтэйчүүдийн 1075 ширхэг зургийг хууль бусаар цуглуулж нийтэд дэлгэнэ гэж бэлгийн болон санхүүгийн дарамт үзүүлдэг байсныг мөрдөн байцаалтын явцад тогтоожээ. Манай улсын 7000 гаруй фэйсбүүк хэрэглэгчийн олонхи нь өсвөр насны хүүхэд, залуучууд байдаг тухай судалгаа бий. Өсвөр насны охидыг модель болгоно, клипэнд тоглуулна гэж хууран хувийн мэдээллийг авч, бэлгийн дарамтад оруулсан хэрэг ч энэ хугацаанд хэд хэд бүртгэгджээ. Гэмт хэргийн хохирогчдын дунд охид, эмэгтэйчүүдээс гадна хөвгүүд хүртэл байгаа аж. Хөвгүүдийг мөн л нүцгэн зургийг нь дотно танилцаж байгаад олж аван айлган сүрдүүлж, мөнгө авсан тохиолдол байгаа аж.

Өнгөрсөн жил Ө гэгч гэрэл зурагчин охид, эмэгтэйчүүдийн нүцгэн зургийг авдаг. Үүнийгээ зүй бус сүрдүүлэгтээ ашиглаж байсан нь тогтоогдсон. Тэрбээр охид, бүсгүйчүүд рүү “Сайн байна уу. Дэлхийн гайхамшиг болж байгаа манай компанийн гайхамшигт шинэ бүтээгдэхүүнүүдтэй танилцаарай. Холбогдоод дэлгэрэнгүй мэдээлэл аваарай. Хамтран ажиллах санал тавьж байна. Холбогдох дугаараа үлдээгээрэй”, “Сайн уу. Найзаар бүртгэж байгаад миний facebook-ийн бүх зургуудыг үзээрэй. Өөрт чинь хэрэгтэй маш гоё саналуудыг тавьж байна аа. Тодруулах зүйл байвал холбогдоод дэлгэрэнгүй мэдээлэл аваарай” гэж захидал бичдэг. Улмаар утасны дугаараа үлдээдэг байна. Мөн “World Global Network” компанийн борлуулдаг гэх хоёр сим карттай гар утасны талаарх мэдээллийг явуулдаг. Хамтарч ажиллах санал нь юу болохыг сонирхож, захидалд нь хариу бичсэн охид, бүсгүйчүүдэд “Би гэрэл зурагчин. Топ модель Одгэрэл миний шавь. Ах нь чамайг тэд нар шиг од болгоод өгнө. Чиний царай төрх яг од болоход тохирно” гэх мэтээр санал тавьдаг аж. Ингэж захидлаар харилцаж байгаад гар утасных нь дугаарыг авдаг. Дараа нь утсаар ярьж ажил дээрээ урьдаг аж. Гэрэл зургийн студид нь очиход яалт ч үгүй зургийг нь авдаг, гоё гарвал сэтгүүл дээр гаргаж өгнө хэмээн амладаг гэнэ. Фото модель болгохын тулд биеийн галбирыг харуулна хэмээн хувцсыг нь тайлуулж зураг авдаг байна. Улмаар нүцгэн зургийг нь олон нийтийн сүлжээгээр тараана хэмээн эрхшээлдээ оруулдаг талаар хохирогчид цагдаад мэдэгдэж хэрэг илэрсэн байна.

Сүрдүүлэг, дарамтад өртсөнл бол цагдаад яаралтай мэдэгдэх ёстой гэв

Цагдаа нар охид, эмэгтэйчүүдийг фэйсбүүк хуудсаар дамжуулан бусадтай танилцахгүй байх, хувийн мэдээллээ бусдад өгөхгүй байхыг анхааруулж байна. Мөн ямар нэгэн байдлаар бусдад дарамтлуулсан тохиолдолд ичиж зовох зүйлгүйгээр цагдаагийн байгууллагад цаг алдалгүй мэдэгдэх ёстойг анхааруулж байна. Цагдаа нар хувийн мэдээллийг ашиглан сүрдүүлж байгаа гэмт хэрэгтнүүдийг илрүүлж, шуурхай арга хэмжээ авч, таны нэр хүндэд халдах зүйлсийг таслан зогсоох бүрэн боломжтой гэдгийг онцлон хэлж байв. Мөн цахим етөнцөөр бусдыг айлган сүрдүүлэх замаар мөнгө авдаг, зүй бус сүрдүүлэг хийж байгаа гэмт хэрэгтнүүдийг Монгол Улсын Эрүүгийн хуулийн 123 (садар самууныг сурталчлах), 149 (бусдын эд хөрөнгийг авахаар далайлган сүрдүүлэх) дүгээр зүйл ангиар эрүүгийн хэрэг үүсгэн хариуцлага ногдуулдаг байна.

Э.Баатар