Өнөөдөр Монголбанкны  ханшаар нэг ам.доллар 1748  төгрөг байна.  Энэ нь таван  сарын өмнөх түүхийг давтах эхлэл болоод байна.  Тодруулбал, ам.долларын ханш дахин өсч эхлээд байна.  7-р сарын 19-ийг  хүртэл  ам.долларын ханш  1470  төгрөгт  багтаж  байсан бөгөөд сарын дараа гэхэд ам.долларын ханш 110 төгрөгөөр нэмэгдсэн.  Улмаар наймдугаар сарын дундуур ам.долларын ханш 1790 төгрөгт хүртлээ өсөж,  1800 болохын даваан дээр  Ерөнхий сайд маань анхаарал хандуулан байж, хэн гэм буруутай болохыг нь тогтоож, тэрхүү этгээдийг зарлах болно гэж мэдэгдэж байсан. Өөрөөр хэлбэл ханшийн энэ өсөлт хэсэг бүлэг нөхдүүдэд ашигтай, дийлэнхр олонход алдагдалтай болохыг Ерөнхий сайд маань тогтоож,  үүнийгээ боль, эсвэл олон нийтэд зарлана гэдгээ мэдэгдэж байсан.  Улмаар ам.долларын ханш буурсан.

Харин өнөөөдөр  таван сарын өмнөх түүх давтагдах гээд байна. Хоёр долоо хоногийн өмнө 1720-1730 төгрөгт хэлбэлзэж байлаа.  Харин өнгөрсөн долоо хоногоос эхлэн 1750-1760 төгрөгт хэлбэлзэж байна. ам.долларын ханш өдрөөс өдөрт өсөж байгаа нь манайх шиг импортлогч орны хувьд хүнд тусах болно.  Үүнийг эдийн засагчид Монголбанкнаас явуулж буй мөнгөний бодлого хэт зөөлдөж байна. Монголбанк  төгрөгийн ханшийг тогтвортой байлгахад голлон анхаарах ёстой гэж үзэж байгаа.

Гэтэл төгрөгийн ханш улам унаж гадаад валютын ханш чангарсаар байхад Монголбанкны зүгээс ямар нэгэн арга хэмжээ авахгүй  байдлыг ажигласаар л байгаа нь хариуцлагагүйн  шинж.  Өөрөөр хэлбэл ажлаа хийж чадахгүй, хариуцлага алдаж байгаа юм.  Ийм нөхдүүдэд хариуцлага тооцох л ёстой.


Ам.долларын ханш чангарч байгаа энэ цаг үед эртхэн дээрээ арга хэмжээ аваач дээ Ерөнхий сайд минь. Учир нь хэдэн сарын өмнө ам.долларын ханш өсөхөд та гол буруутанг тогтоосон. Улмаар  олон нийтэд зарлаж бурууг нь ойлгуулах болно гэж байсан.  Харин  Ерөнхий сайд маань өнөөдрийг хүртэл энэ талаар ам нээхгүй байгаа нь  “амаа үдүүлчихсэн” байх гэсэн хардлагыг төрүүлж байна.  хэрвээ тухайн едээ зарлачихсан бол  байдал өнөөдөр ийм дээрээ тулах байсан уу  үгүй юу?

Хэрвээ Ерөнхий сайд энэ хэвээрээ амаа үдүүлсэн чигтээ байх юм бол  төгрөгийн ханш суларч,  ам.доллар нь  өссөөр  иргэд туйлдах нь тодорхой. Тэр үед та хариуцлагаа хүлээх үү? Эсвэл буруутайгаа хүлээгээд эртхэн арга хэмжээ авах уу гэдгээ та л шийд дээ.

А.Баярмаа