Авлига бол Эрүүл мэндийн салбарт үүссэн хорт хавдар. Одоогоор эмчлэх аргыг судлаж, туршиж байгаа ч үр дүн тун бага. Өвдсөн, өвчилсөн хэн бүхэн эмнэлгийн хаалга татмагцаа эмчийн гар дээш харуулахгүй бол үхлийн хоногоо тоолж суухаас өөр аргагүй нөхцөл байдалд амьдарч суугаа нь өнөөгийн нийгмийн бодит үнэн.

Эмч нь албан үүргээ биелүүлснийхээ төлөө хууль бус шан харамж авах нь авлига. Хүн бүр мэднэ. Монгол Улсын хамгийн өндөр хээл хахуультай салбаруудын жагсаалтыг эрүүл мэндийн салбар тэргүүлж байна.

Энэ салбарын сайд нар хүртэл авлигын хэрэгт холбогдож, аавын хаалга татсаныг нь жишээ болгон дурьдаж болно. Түүнчлэн авлига авсан эл салбарын удирдах ажилтны хэргийг саяхан хэрэгсэхгүй болгожээ. Тодруулбал, Эрүүл мэндийн яамны Төрийн захиргаа удирдлагын хэлтсийн даргаар ажиллаж байсан Д.Оюунчимэг нь Эрүүл мэндийг дэмжих сангийн 2012-2013 оны хөрөнгөөр хэрэгжүүлсэн “Эрүүл мэндийн байгууллагын хөгжлийн хөтөлбөрийг боловсруулах”, Эрүүл мэндийн ажилтны хариуцлагын даатгалын тухай хуулийн төсөл боловсруулах, хэлэлцүүлэх үйл ажиллагаанд зарцуулах хөрөнгөнөөс 14.598.750 төгрөгийг хувьдаа завшиж, улсад үлэмж хэмжээний хохирол учруулсан болох нь тогтоогджээ.

Гол нь хөрөнгө завшсан нь ийн тодорхой атал хэргийг хэрэгсэхгүй болгосон үндэслэл нь Д.Оюунчимэг 7.694.000 төгрөгийг 2014 оны арванхоёрдугаар сарын 23-ны өдөр Эрүүл мэндийг дэмжих санд буцаан тушааж, 5.470.000 төгрөгийг 2015 оны гуравдугаар сарын 19-нд АТГ-ын дансанд нөхөн төлсөнтэй холбоотой юм байх.

Товчхондоо зувчуулсан нь баригдаж, хуулийн байгууллагад шалгуулмагц нөхөн төлөөд л гүйцээ гэнэ. Хэрэв хэрэг илрээгүй бол зувчуулснаараа дуусаж, улс хохирдгоороо хохироод үлдэх байж. Энэ үндэслэлээр бол Эрүүл мэндийн сайд асан Г.Шийлэгдамба ч буруугүй мэт. Тэр авлига авах гэж байгаад баригдсан. Авч чадаагүй газар дээрээ баригдсан учраас улсад сохор зоосны ч хохирол учруулаагүй. Тиймээс хэргийг хэрэгсэхгүй болгож, бүр мань хүнийг гэм зэмгүй гэж үзэж болохуйц. Хэрэв ингээд л хэрэг шийдэгдчихдэг бол шуугиан дэгдээж, шоудаж, хэрэг үүсгэх юун. Оронд нь хамгийн их авлига авсан эмчийг оны эцэст шалгаруулж, нэмж урамшуулдаг болчихооч.

Өдгөө энэ салбарын Төрийн нарийн бичгийн дарга, газрын дарга, түүгээр ч тогтохгүй мэргэжилтнүүд нь хүртэл хээл хахуульгүй бол хуруугаа ч хөдлөгдөггүй гэх хардлага олон нийтийн дунд байсаар байгаа. Ямартаа л хамгийн том газрынх нь дарга улсын мөнгөнөөс хэдэн зуун саяар хулгайлсан нь тогтоогдсон ч яаж ийж байгаад албан тушаалдаа үлдэж, улмаар хэрэг нь хэрэгсэхгүй болсон нь гайхалтай. Баригдахгүй бол идээд, баригдчихвал буцааж төлөөд л болдог бол Төрийн албан хаагчид минь бүгд авлига авч баймаар юм биш үү. Нөгөө шударга ёс чинь хаана байна аа, Ерөнхий сайдаа.

Та уг нь хулгайч нартай ажиллахгүй гэдгээ улс орон даяар цуурайттал хашгирсансан. Тамгаа авахдаа ч төрийн албан хаагчийн ёс зүйн хэм хэмжээг чанд сахих, авлига, хээл хахууль, хүнд суртал, шударга бус байдалтай бүх шатанд тууштай тэмцэх, төрийн албан хаагчийн ажлыг дүгнэх, хариуцлага тооцох, урамшуулах зэрэг асуудлаар гаргасан “Албан даалгавар”-ыг хэрэгжүүлэхээр төлөвлөснөө дуулгасан биш бил үү. Харамсалтай нь, үг, үйлдэл тань зөрж, хулгайчид тоонот гэрт тань орогнож байна.

Нийгмийн шуудан сонин