Нийслэлийн Засаг дарга бөгөөд Улаанбаатар хотын захирагч, Нийслэлийн МАН-ын хорооны дарга Д.Сумъяабазарыг 72 цагийн хугацаанд огцруулах мэдэгдэл бүхий албан шаардлагыг Ардчилсан намын нэр бүхий удирдлагууд хүргүүлсэн билээ.

Тэд шаардлагадаа: "Өнгөрсөн 7 дугаар сараас эхлэн орсон аадар бороо нийслэлийн дүүргүүдийн 140 гаруй барилга, байгууламжийг үерт автуулан оршин суугчдын амь нас, эрүүл мэнд, эд хөрөнгөд хохирол учруулаад байсан ч холбогдох албан тушаалтнууд өндөржүүлсэн бэлэн байдлыг зарлах төдийхнөөр аргацааж, дорвитой арга хэмжээ авалгүй өнөөдрийг хүрэв.

 

Нийслэлийн Засаг дарга нь эрсдэлийн үнэлгээ хийлгэн шаардлагатай арга хэмжээг төлөвлөн хэрэгжүүлж, гамшгаас хамгаалах үйл ажиллагааг нэгдсэн удирдлага, зохицуулалтаар шуурхай хангаж, гамшгийн нөхцөл байдалд хэрэгжүүлэх арга хэмжээг холбогдох байгууллагад мэдээлэх мөн эдгээр байгууллагуудаас дэмжлэг авах зэрэг хуульд заасан чиг үүргээ хэрэгжүүлсэн бол дөрвөн хүний халуун амь эрсдэхгүй байлаа. 

 

Цаашид нийслэлчүүд бид амь нас, эрүүл мэнд, эд хөрөнгөө ийм хариуцлагагүй албан тушаалтнуудын гарт даатгаад байж боломжгүй байна. Иймд Улаанбаатар хотын захирагч бөгөөд Нийслэлийн засаг дарга Д.Сумъяабазар танд дараах хоёр ШААРДЛАГЫГ хүргүүлж байна.

 

Үүнд:

 

1.Нутаг дэвсгэрийнхээ нийгэм, эдийн засаг, хүн амын амьдралын асуудалтай холбогдох хуулиар хүлээсэн үүргээ хангалтгүй биелүүлсэн Улаанбаатар хотын захирагч бөгөөд Нийслэлийн Засаг дарга Д.Сумъяабазар та улс төрийн хариуцлага хүлээж, өөрийн хүсэлтээр огцрохыг шаардаж байна. Хэрэв ажлын гурав хоногийн дотор арга хэмжээ авч огцруулахгүй бол тэмцлийн хурц хэлбэрт шилжихийг мэдэгдье!

 

2.Үер усны гамшигт нэрвэгдсэн иргэдийн хохирлын тооцооллыг гаргаж, тэдний хохирлыг барагдуулах!" гэсэн байв.

 

 

Эх сурвалжуудын өгүүлж буйгаар Нийслэлийн Засаг дарга бөгөөд Улаанбаатар хотын захирагч, Нийслэлийн МАН-ын хорооны дарга  Д.Сумъяабазар энэ бүхний цаана Монгол Улсын Сайд, ЗГХЭГ-ийн дарга, МАН-ын Ерөнхий Нарийн Бичгийн Дарга Д.Амарбаясгаланг байгаа гэж хардаж байгаа аж.

 

Ер нь Д.Сумьяабазар, Д.Амарбаясгалан нарын харилцаа хэдэн жилийн өмнөөс л сайнгүй байгаа ба Аймаг, нийслэл, сум, дүүргийн ИТХ-ын 2020 оны сонгуулийн өмнө бүр маш тааруухан байсан. Д.Амарбаясгалантай нэг баг гэгдэх Монгол Улсын Шадар Сайд, УИХ-ын гишүүн С.Амарсайхан ба Нийслэлийн Засаг дарга бөгөөд Улаанбаатар хотын захирагч, Нийслэлийн МАН-ын хорооны дарга Д.Сумъяабазар нарын хувьд ил цагаан зөрчилдөж, бүр хэрүүл маргаан нь Монгол Улсын Ерөнхий Сайд: "Та хоёр эвээ ол" гэж ярих хэмжээнд даамжирсан.

Энэ бүхнээс үүдэн, мөн тодорхой аргумент байгаа учраас Д.Сумьяабазар өөрийг нь огцруулах акцийг Д.Амарбаясгалан зохион байгуулсан гэж хардаж байгаа бололтой.

Тодруулбал Нийслэлийн Засаг дарга Д.Сумъяабазарыг 72 цагийн хугацаанд огцруулах акцийг манлайлж буй АН-ын Хэрэг Эрхлэх Газрын Дарга Н.Лхагвадорж нь Д.Амарбаясгалантай нэг нутаг буюу Говь-Алтай аймгийнх аж. Иймээс ч Говь-Алтайд болсон Хан Тайшир уулын аймгийн 100 жилийн ойн наадам гэгчийн үеэр уг акцийнхаа үүрэг, чиглэлийг авсан байх магадлалтай гэж хардаж буй гэнэ.

Э.Мягмар

sonin.mn