Өнөөгийн нийгэмд бичигдээгүй хууль гээд хэлчихэд нэг их буруутахгүй зүйл нь томчуудын хэрэг өвчнөөр гал намждаг моод. Уг моод дэлгэрээд удаж буй ч төгсөх болоогүй байна. Тэдний энэ арга мэхэнд ард түмэн хууртахаа ч больжээ. Ямар сайндаа л Бадамжунайгийн бие чилээрхэж гуравдугаар эмнэлэгт хүргэгдлээ гэх мэдээлэлд итгэж байгаа хүн ч гарсангүй. Монголчууд уг нь их өр зөөлөн хүмүүс дээ. Одоо л хэрсүү байж өвдсөн ч хариуцлагыг нь хатуухан өгөх нь зүйтэй гэж үзэж буй бололтой. 

ХХААХҮ-ийн сайд асан тэрбээр юуны учир шүүхэд дуудагдах болсныг гэдгийг энд дурдая. Ц.Мөнх-Оргилоор зуучлуулж, "Эрдэнэт"-ээс $6.3 саяыг "унагасан" гэгддэг. Т.Бадамжунайг "Шувуу" ажиллагааны хүрээнд гаднаас авчран, саатуулан шалгаж байгаад, Үндэсний их баяр наадмын өмнө суллаж, мөрдөн шалгах ажиллагааг үргэлжлүүлж байсан юм.

Түүнийг Эрүүгийн хуулийн тусгайн ангийн:

  • 22.1 дүгээр зүйлийн 1 дэх хэсэг, /Эрх мэдэл, албан тушаалын байдлаа урвуулан ашиглах/,
  • 22.5 дугаар зүйлийн 1 дэх хэсэг, /Хахууль өгөх/,
  • 18.6 дугаар зүйлийн 1 дэх хэсэгт /Мөнгө угаах/, заасан гэмт хэрэгт холбогдуулан яллагдагчаар татаж, цагдан хориод буй.

Харин Нүүрсний хэрэгт холбогдоод буй Эрдэнэс Тавантолгой ХК-ийн захирал асан Б.Ганхуягийг мөн л өчигдөр өвдлөө гэх мэдээлэл цацагдав. Олон нийтийн зүгээс яахаар зэрэг өвддөг байна гэх хардлагыг төрүүлээд авсан юм. Гэхдээ түүний хувьд биеийн байдал хэвийн байгаа бөгөөд өвдсөн гэх мэдээлэл нь худал гэдгийг хорих ангиас өгөх нь тэр.  

УИХ-ын гишүүн асан Т.Аюурсайхан, Эрдэнэс Тавантолгой ХК-ийн захирал асан Б.Ганхуяг нарын 11 хүнд холбогдох нүүрсний гэх хэргийн урьдчилсан хэлэлцүүлэг энэ сарын 20-ны өдөр болж, гэм буруугийн шүүх хурлыг есдүгээр сарын 28-ны өдөр хийхээр товлосон байгаа юм. 

Тэгвэл нийгэмд ижил утга бүхий сенсаацийг  түгээсэн нь даанч бүтэлгүйтэв.