Замын ачааллыг бууруулж, нэгдүгээр эгнээг чөлөөтэй байлгах зорилгоор эзэнгүй орхисон автомашиныг ачиж журамлах ажлыг нийслэл хотод эхлүүлээд нэлээд хугацааг ардаа орхиж буй. Нэгэнт л жолооч нь дүрэм журмаа зөрчсөн бол хуулийнхаа дагуу ачихаас өөр замгүй. Гэхдээ ачихад бас учир байна аа.

Ачдаг машин хэт улайран бизнесийн төлөө явах болсон нь олон хүний шүүмжлэлийг дагуулах болсон. Уул нь эл ачдаг машинууд өөрсдөө үлгэр жишээ ч байж жолооч нартаа зөвийг суулгах нь чухал. Гэтэл хэт мөнгөний төлөө улайран зүтгэж яваа нь юуны учир вэ?

Нэг компани дунджаар ганцхан хоногийн дотор сая гаруй төгрөгийн орлогыг олдог аж. Энэ нь сүүлдээ иргэдээс өндөр хураамж авах нэг төрлийн бизнес болж байгааг жолооч нар шүүмжилдэг ч машинаа авахын тулд өнөөх мөнгийг нь наашаа харж инээж, цаашаа харж уурлан байж тушаадаг нь нууц биш.

Тухайлбал, машиныг нь ачих гэж байхад гарч ирсэн хүнээс газар дээр нь 70 мянган төгрөг авч байж машиныг нь өгдөг журмыг ч компаниуд өөрсдөө гаргачихаад байгаа гэх.

Ачиж л байвал бол оо гэсэн шиг машин дотор нь юу байгаа ч харах сөхөөгүй ум хум ачаад оддог. Үүнийхээ ачаар хоёр ч удаа өлгийтэй хүүхэдтэй ачсан тохиолдол гарсан. Тэгвэл энэ мөн юу ч биш бололтой. Сүүлдээ бүүр даварсаар даварсаар... хүний эд хөрөнгө, амь насанд нь заналхийлдэг болжээ.

Дүрэм зөрчин урсгал сөрж давхиж байгаад нэгэн машиныг мөргөн авто осол гаргажээ. Тэдэнд нэгдүгээр эгнээг чөлөөлөх эрх нь байгаа ч хэт мөнгөний төлөө энэ үйл ажиллагааныхаа утгыг алдагдуулж байна гэж хэлэгдэхэд хүрээд байгааг дээрх баримтууд нотолно.

Өөр нэг асуудал нь хотын хөдөлгөөнийг зохицуулж буй ачдаг машинууд хэзээ ч жип машин ачиж яваа нь харагддаггүй. Учрыг асуувал жип машин ачихад тороос нь дийлэхгүй гээд суудлын тэрэг л журамладаг гэх яриа гарган олон нийтийн дургүйцлийг хүргээд авсан удаатай.

Машин ачих ажил эхлээд жолооч, ачигч нарын хэрүүл маргаан, машинаа хайсан эрэл хайгуул үргэлжилсээр л байгаа ч сүүлдээ амь насанд заналхийлж буй нь хэрээс хэтэрлээ.

 

Энэхүү бичлэгийг Paparazzi+Traffic группт нэгэн иргэний оруулснаар хүргэж байгаа болно.

Х.Даваа