Монгол Улсын Ерөнхий сайд Л.Оюун-Эрдэнэд итгэл хүлээлгэх тухай тогтоолын төслийг УИХ-д өргөн бариад буй билээ. Хэрвээ уг тогтоолыг УИХ-ын гишүүдийн олонхи дэмжихгүй бол Монгол Улсын Ерөнхий Сайдыг шинээр томилох асуудал гарч ирнэ.

Үүнтэй холбоотойгоор УИХ-ын гишүүн биш хүн Монгол Улсын Ерөнхий Сайдад ажиллах нь зохисгүй гэсэн яриаг улс төрийн хүрээнд санаатайгаар гаргаж байна. Бүр сэтгүүлч гэх зарим охид, эмэгтэйчүүд “УИХ-ын гишүүн хүнийг Монгол Улсын Ерөнхий Сайд болгох нь Үндсэн хуулийн зарчим, логик, Монгол Улсын Ерөнхий Сайдууд бүгд УИХ-ын гишүүн байсан” гэх илт худал мэдээллийг санаатайгаар тараах болжээ.

 

Бодит байдал дээр УИХ-ын гишүүн хүнийг Монгол Улсын Ерөнхий Сайд болгох ёстой гэсэн заалт, санаа, логик Монгол Улсын Үндсэн хуулинд байхгүй, хэзээ ч байгаагүй, байх ч үгүй юм.

 

Онол ярих аваас Монтескогийн засаглал хувиарлах зарчим талаасаа эсрэгээрээ УИХ-ын гишүүн байх нь зарчимгүй. Мөн Монгол Улсад хэд хэдэн УИХ-ын гишүүн бус хүн Монгол Улсын Ерөнхий Сайдаар ажиллаж байжээ.

Тодруулбал 1996 онд тухайн үед Ерөнхийлөгчийн Тамгын Газрын Дарга, МҮАН-МСДН-ын “Ардчилсан Холбоо” эвслийн ерөнхий менежер байсан М.Энхсайхан, 1998 онд тухайн үед Нийслэлийн Засаг Дарга бөгөөд Улаанбаатар хотын захирагч байсан Ж.Наранцацралт, 2004 онд тухайн үед АН-ын ҮБХ-ы гишүүн байсан Ц.Элбэгдорж, 2007 онд тухайн үед МАХН-ын Ерөнхий Нарийн Бичгийн Дарга байсан С.Баяр, 2017 онд Монгол Улсын Шадар Сайд байсан У.Хүрэлсүх нар Монгол Улсын Ерөнхий Сайдаар томилогдож байсан.

 

Сонирхолтой нь эдгээр УИХ-ын гишүүн биш Ерөнхий Сайдууд хамгийн шийдэмгий ажиллаж байсан байх юм.

 

“ Үнэ чөлөөлсөн, орон сууц хувьчилсан” гээд М.Энхсайханы эдийн засгийн реформын эерэг үр дүнг одоо ч судлаачид өндрөөр үнэлдэг. Ж.Наранцацралт авилгатай маш сайн тэмцэж байсан. Ц.Элбэгдоржийн үед Радио Телевизийн ХЭГ-ийг татан буулгаж, олон нийтийн телевизийг анх байгуулж байсан бол С.Баяр эхний бүрэн эрхийнхээ хугацаанд “Атрын 3-р аян”-г эхлүүлж байсан. У.Хүрэлсүх Ерөнхий Сайд болсон түүхийг бид мартаагүй байна.

Тэгвэл шинээр томилогдох Ерөнхий Сайд мөн л УИХ-ын гишүүн биш нэгэн байж, зоримог шийдэмгий ажиллахыг үгүйсгэх аргагүй юм.

sonin.mn