"Хошин урлаг нийтийн дуучдын хамтарсан тоглолт" ёслол төгөлдөр болж өндөрлөлөө

    Урлагийн мэдээ мэдээллийн төрөлжсөн сайт болох урлаг.мн сайтын хамт олны монголын сэтгүүл зүй болоод урлагийн салбарт хоёргүй сэтгэлээр хүчин зүтгэсний 5-н жилийн ойн хүрээнд томоохон хэмжээний 3 дахь тоглолтоо зохион байгуулаад байгаа бөгөөд өчигдөр буюу олон улсын инээдмийн баярын өдрөөр хошин урлаг, нийтийн дуучдын хамтарсан тоглолтыг Монгол бөхийн өргөөнөө ёслол төгөлдөр зохион байгуулж дууслаа.

    Бидний тоглолтонд Монголын урлагийн үе үеийн шилдэг уран бүтээлчид ард түмний сэтгэлд хоногшсон олон сайхан уран бүтээлээ толилуулж үзэгчдийн сэтгэлийг огшоогоод авсан юм. Тоглолтыг монголын хошин урлагийн "Мөрөөдлийн театр" хамтлаг өөрсдийн шилдэг үзүүлбэрээрээ нээсэн бол МУГЖ Д.Галсантогтох лимбэ хөгжмөөр хөгжимдөн өөрийн алиа хошин зангаараа үзэгчдийг байлдан дагуулж чадсан бөгөөд үргэлжлүүлэн МУГЖ Б.Туяа, МУГЖ Б.Чаминчулуун, МУГЖ Эрдэнэ-Бат, МУГЖ У.Далантай МУГЖ С.Эрдэнэцэцэг зэрэг уран бүтээлчид өөрсдийн шилдэг гэсэн уран бүтээлүүдээ дарааллан толилуулсан нь үзэгчдийг ёстой л нэг огшоож байсан юм.

  Тоглолтын бас нэгэн сэтгэл хөдөлгөсөн хэсэг нь Монголын урлагт бүхий л амьдарлаа зориулж МУГЖ хэмээх эрхэм цолоор энгэрээ мялаалгуулаад удаагүй байгаа ард түмний хайртай дуучин МУГЖ Н.Төмөрхуяг хүрэлцэн ирж өөрийн хит болсон уран бүтээлийг гитар хөгжмийн хамт эгшиглүүлсэн явдал байсан юм.

  Ийнхүү бидний 5-н жилийн ойн хүрээнд зохион байгуулсан Хошин урлаг, нийтийн дуучдын хамтарсан тоглолт танхим дүүрэн үзэгчдийн халуун алга ташилтан дор болж өндөрлөлөө.

  Энэ хугацаанд бидний хүсэл тэмүүлэл, хичээл зүтгэлтэй хамт байж монголын урлагийн болоод сэтгүүл зүйн түүхийг хамтдаа бичилцсэн бүх хүмүүсдээ талархаж буйгаа илэрхийлье.

 Урлагийн тэнгэр өнөд ивээж явах болтугай...