Засгийн газрын Хэрэг эрхлэх газраас энэ сарын 1-нд МАХН-ын дарга Н.Энхбаярыг Шадар сайдад томилох боломжтой эсэх талаар мэдээлэл авахаар АТГ-т албан бичиг илгээсэн. Харин АТГ-аас Н.Энхбаярыг ашиг сонирхлын зөрчилтэй гэж үзсэн тул Шадар сайдаар томилохыг дэмжихгүй гэсэн хариу өгсөн талаар бид өмнө нь мэдээлсэн.

Өнөөдөр АТГ-аас мэдээлэл хийж, Н.Энхбаярыг ялтайд тооцох хугацаа нь 2017 онд дуусна гэдгийг мэдэгдлээ. Өөрөөр хэлбэл, МАХН-ын дарга Н.Энхбаяр 2017 оны наймдугаар сарыг хүртэл төрийн албанд ажиллах боломжгүй юм байна. АТГ энэ талаарх дүгнэлтээ Засгийн газарт хүргүүлсэн.

Гэвч Н. Энхбаяр тэр болтол тэсэхгүй гэдгээ намын нөхөд болон бусад нам эвслийнхэнд хатуухан хэлээд авсан байна. Энэ жил УИХ-ын сонгууль болно. Залгуулаад Засгийн газрыг бүрдүүлнэ. Бялуу хуваалт үргэлжилнэ. Хойтон жил Ерөнхийлөгчийн сонгууль болно. Иймээс ямар нэгэн гарц олж төрийн албанд ажиллах эрхтэй болох хугацаагаа наашлуулхын төлөө тэмцэхээ Н. Энхбаяр илэрхийлжээ. Тэр гарц нь Дээд шүүх байх уу, Үндсэн хуулийн цэц байх уу, эсвэл эрх барьж буй улс төрийн хүчин байх уу гэдгийг хайж, шаргуу тэмцэхээ ч илэрхийлсэн байна.

Ц. Мөнх

www.newscom.mn