Том оврын автобусны жолооч нарыг түрэмгий, танхай гэдгийг хүн бүр мэднэ.  Гэхдээ тэд ийм байх учиргүй.  Өөрөөр хэлбэл автобусны жолооч өөрөөсөө гадна олон арван хүний амь насыг хариуцаж, хотын соёлыг түгээгч нэгэн байх ёстой.

Өөрөөр хэлбэл  олон нийтэд түргэн шуурхай, аюулгүй үйлчил гээд  автозамын нэгдүгээр эгнээг чөлөөлж өгсөн. Тэгтэл  автобусны  жолооч нар томоожих нь битгий хэл ёс суртахуун, хувь хүнтэй холбоотой асуудлууд өөрчлөгдсөнгүй. Зөвхөн  нэгдүгээр эгнээгээр явах ёстой автобуснууд гуравдугаар эгнээнээс нэгдүгээр эгнээ рүү, нэгээс гурав руу гэх мэтчилэн зам дээр дураараа авирлана. Үүнээс нь болж зохиомол түгжрэл үүснэ.  

Үүнээс гадна  үе үе тормос гишгэж зорчигчдын нуруу нугасыг таслах шахна.   Гэнэт огцом тормослосны улмаас зорчигч унах юм бол  “зүгээр үү?” гэж асуухын оронд “сайн барьж явах чинь яасан юм бэ?” гэж ирээд л загнана.  Өөрөөс нь болж хохирвол хариуцлага хүлээх шинж ер нь алгаа. Аль ч улсын нийтийн тээвэрт ийм бүдүүлэг араншин байдаггүй л байх.  

Автобусан дотроо тамхи татдаг, зорчигчдынхоо тавьсан шаардлагыг биелүүлдэггүй, Өнөөдөр бүх автобусанд  тамхи татахыг  хориглочихоод байгаа.  Тэгтэл автобусны жолооч нар  кабиндаа тамхиа баагиулан татаж байгаад л цонхоор акуркаа шидэж танхайрдаг.   Зорчигч, замын хөдөлгөөнд оролцогчдыг   утгаар нь дээрэлхэж байгаа юм.   
Энэ мэтээр  автобусны жолооч нарын гаргадаг нийтлэг  дутагдал нэгээр дуусахгүй.  

Зорчигч сууж, бууж амжаагүй байхад хөдөлгөөнөө эхлүүлж, хаалганд хавчина, 2-р эгнээнээс зорчигчоо буулгаж суулгана.  Тэгсэн хэрнээ нийтийн тээврийнхэн өөрсдийн эрх ашгийн төлөө тэмцэхдээ сайн. Цалингаа тэдэн хувиар нэмэгдүүлнэ хэмээн ажил хаяж, жагсаж эсэргүүцнэ. Ажлаа дээд зэргээр сайн хийгээд нэмүүлье гэвэл асуудалгүй л байх...

Тэгвэл энэ бүхнийг хэрхэн таслан зогсооход  автобус компанийн удирдлага сэтгэл гаргаад хэдэн сургалт явуулаад  жолооч нараа сургачих хэрэгтэй  байгаа юм.  Өөрөөр хэлбэл автобусны жолооч нарт  хотын соёл, харилцааны соёл,  ажлын ёс зүй  зэрэг цогц сэдвээр   сургалт явуулчихмаар байнаа.  Нөгөө талаас автобусны жолооч нарын хариуцлага, ур чадвар, ёс зүйг дээшлүүлэх чиглэлээр тодорхой арга хэмжээ авах цаг болжээ. Согтуугаар автобус жолоодох,  жолоогоо бусдад шилжүүлэх, хурд хэтрүүлснээс явган зорчигчийн аминд хүрсэн гээд зорчигч, замын хөдөлгөөнд оролцогчдыг хохироосоор байна.

Тиймээс энэ асуудлыг шийдвэрлэж иргэдийг нийтийн тээврээр тайван амгалан тайван зорчих нөхцлийг бүрдүүлэхэд анхаарч өгнө үү Нийтийн тээврийн газрынхаан, автобус компанийн удирдлагуудаа...

А.Баяраа