Хичээлийн шинэ жил эхлэх үеэр нийслэлийн авто замын хөдөлгөөний ачаалал эрс нэмэгддэг. Үүнтэй холбоотойгоор нийслэлийн Засаг даргын А/642 тоот захирамжаар наймдугаар сарын 28, 29-ний өдөр тээврийн хэрэгслүүдийг тэгш, сондгой дугаараар зорчуулах зохицуулалт хийсэн.

Тодруулбал,

• Наймдугаар сарын 28-ны Бямба гарагт автомашины улсын дугаарын сүүлчийн орон нь тэгш,
• Наймдугаар сарын 29-ний Ням гарагт сондгой тоогоор төгссөн тээврийн хэрэгслийг 08:00-20:00 цагийн хооронд замын хөдөлгөөнд оролцуулах юм.

Дугаарын хязгаарлалт нь Саппорогийн уулзвараас Офицеруудын ордон, 32-ын тойргоос 120-ын уулзвар хүртэл үйлчилнэ.

Мөн энэ үеэр буюу наймдугаар сарын 28, 29-нд Энхтайваны өргөн чөлөө буюу Зүүн дөрвөн замаас Баруун дөрвөн зам хүртэлх гудамжийг 08:00-20:00 цагийн хооронд автомашингүй гудамж болгон, хичээлийн хэрэгсэл, дүрэмт хувцасны үзэсгэлэн худалдаа зохион байгуулахаар болсон юм.