Монгол Улс, Япон Улсын хооронд дипломат харилцаа тогтоосны 50 жилийн ой тохиож байгаатай холбогдуулан Япон Улсын Токушима дах Монгол Улсын Өргөмжит консул, Соёлын элч Каваүчи Широ сангийн санаачилгын дагуу “Cүүн зам” бүжгийн наадмыг Улаанбаатар хотноо 8 дугаар сарын 22-ны өдөр зохион байгуулах гэж байна. Уг наадамд Япон Улсын парламентын гишүүн Ямагүчи Шүничи, Ямазаки Масаяасү, Токүшима мужийн дэд захирагч, мөн Анан хотын захирагчаар ахлуулсан албаны болон бизнес, соёл, урлаг, спортын 170 орчим төлөөлөгчид хүрэлцэн ирж оролцоно.

Наадмын ерөнхий зохион байгуулагчаар “Хүн гэр театр”, “СУИС”-ийн Бүжгийн Урлагийн Сургууль, хамтран зохион байгуулагчаар НАЖГ ажиллаж байна. Тус бүжгийн наадам нь Монгол Улсад анх удаагаа зохион байгуулагдаж байгаагаараа онцлог бөгөөд бүжгийн “Парад наадам”-аар Япон орны ардын урлаг, өв соёлын нэг болох “Ава одори”, “Ёсакой” бүжгийн урлагаас танилцуулахын зэрэгцээ Монголын үндэсний болон орчин үеийн бүжгийн тоглолтыг хамтран зохион байгуулах юм.

“Cүүн зам” бүжгийн наадам нь хоёр улсын соёл, урлагийн хамтын ажиллагааг өргөжүүлэн, дэлгэрүүлэх зорилготой бөгөөд түүхэн ойн хүрээнд зохион байгуулагдаж буй томоохон ажлуудын нэг юм.