Монголын Залуучуудын Холбоо өнгөрсөн оны хоёрдугаар сараас эхлэн “Спирт үү, Спорт уу” аяныг орон даяар эхлүүлсэн билээ. Энэ аяны хүрээнд “Залуу дугуйчин” клуб, “Залуучуудын аялал жуулчлалын төв”-ийг байгуулж “Нийслэлийн машингүй өдөр”-ийг тохиолдуулан “Улаанбаатар-2013” дугуйн парад, долоо хоног бүрийн амралтын өдрөөр залуустай хамт явган аялал болон дугуйтай аялалыг зохион байгуулсан юм.

Мөн нийслэлийн сургуулиудад спорт заалаа нээлттэй болгох уриалгыг хүргүүлсэн. Ингэснээр хүүхэд залуучуудаа спортод элэгтэй болгож, бие бялдарыг нь хөгжүүлэх, оюун ухааныг нь сэргээх ач холбогдолтой аж.

Өнөөгийн залуусын 70 хувь нь фэйсчбүүк, твиттер ашиглагдаг гэсэн судалгаа байдаг. Тиймээс онлайн ертөнцөөр дамжуулан тэдэнд спиртыг бус, спортыг дэмжих ухамсрыг суулгах үүднээс “Баар луу биш заал руу”, “Спортлог залуус”, “Шинэ үе спортыг сонгож байна”, “И биш О”-г сонгоё зэрэг олон уриалгуудыг гаргасан юм.

Түүнчлэн спортод амжилт гаргасан, хүүхэд залуусын үлгэр дууриал болсон спортын алдартнуудыг урьж архинаас татгалзаж, спортыг сонгох хэрэгтэйг ойлгуулсан лекцүүдийг зохион байгуулж байсан.

Тэгвэл тэд ирэх онд буюу 2014 онд Монголын Залуучуудын Холбоо “Спирт үү, Спорт уу” аянаа үргэлжүүлэх гэнэ.  Учир нь МЗХ-ны Ерөнхийлөгч А.Мөнхбат өөрийн твиттер хуудаснаа “Архитай биш, Тархитай ажилладаг хууль хэрэгтэй” хэмээн жиргэсэн нь тус холбоо дараа жилийг оюуны жил болгон харж байгаа бөгөөд иргэдийн ухамсарт илүү нөлөөлөх, залуучуудын тархинд, архины хор уршиг, нийгэмд ямар хор нөлөө, муу үр дагавар авчрана гэдгийг ой ухаанд нь суулгаж өгөх юм байна.

Тиймээс ч “Архигүй Монгол” сумын залууст зориулсан төслийг, орон нутагт амьдардаг залуус дээр биечлэн очиж уулзаж, архины хор уршгийг тархинд нь суулгаж өгөх үүднээс “Архитай биш, Тархитай ажилладаг хууль хэрэгтэй” гэсэн уриалгыг гаргаж байгаа аж.

Х.Даваа