Монголдоо нэртэй хэдэн компанийн нэг нь “Түшиг” юм. Тус компанийг үүсгэн байгуулагч Г.Сүхээ дэлхийд хамгийн ашигтай бизнесүүдийн нэг болох гоо сайхны бүтээгдэхүүн худалдааны салбарт хүч сорьж, Улаанбаатар хотын  А зэрэглэлийн бүсэд хоёр ч том барилга сүндэрлүүлээд авсан.

Түүний хүү Г.Баттүшиг АНУ-д боловсрол эзэмшсэн нэгэн. Тэрбээр саяхныг хүртэл “Үнэтэй машин хөлөглөж, хөлс хүчээ дуслуулан байж олсон мөнгөө дэмий зүйлд үрэхгүй” хэмээн хэлж байсан нь өнөө цагийн мөнгөлөг, хөрөнгөлөг хүмүүсийн хүүхдүүдээс эрс ялгарч байв. Г.Сүхээ гуайн хүү бизнесээ ч өргөжүүлж, гэр бүлээ ч зохиож “Монгол Анжелина Жоли” гэгддэг Э.Мөнгөнцэцэг гэдэг бүсгүйтэй дэр нэгтгээд багагүй хугацаа өнгөрлөө. Баян айлын өв залгамжлагч хүүтэй гэрлэсэн энэ бүсгүй өдгөө “The Royal Diamond” үнэт эдлэлийн дэлгүүр, дэлхийн алдарт брэнд болох "Chanel"-ийн салбарыг Монголд нээн ажиллуулж байгаа. Нийслэл хотын төвд байрлах Улаанбаатар их дэлгүүрийн нэгдүгээр давхарт энэхүү тансаг үнэртний салбар байдгийг бүсгүйчүүд андахгүй. 

Харин өнгөрөгч амралтын өдрөөр Э.Мөнгөнцэцэг захирал хавь ойрынхныхоо айдас, гайхшралыг төрүүлэм авир гаргажээ. Чухам юу болсон талаар дэлгэрэнгүй хүргэе. Нэгэн бүсгүй Улаанбаатар их дэлгүүрт байрлах "Chanel"-ийн салбараас фаундешн, уруулын будаг авахаар оржээ. Ингээд худалдагч бүсгүйгээс “Эдгээр бүтээгдэхүүний тест байна уу” гэж асуусан аж. Гэтэл худалдагч эмэгтэй “Тест байхгүй. Энэ уруулын будгийг ухаад түрхээд үз” гээд хэн хэзээ хэрэглэж байсан нь үл мэдэгдэм уруулын будаг, олон хүн ашиглаж элэгдсэн багс гаргаж өгчээ. Худалдагч, үйлчлүүлэгч хоёр ийн ярилцах зуур Э.Мөнгөнцэцэг хатагтай гарч ирсэн байна. Үйлчлүүлэгч бүсгүй энэ хатагтайг зүс мэдэх учраас түүнд хандаж “Танайх ийм алдартай брэндийн салбар байж тест байдаггүй юм уу. Энэ багсаа хар даа” гэж хэлтэл захирал бүсгүй түүнд ихэмсэг зан гаргаж, үйлчлүүлэгчээсээ уучлалт хүсэхийн оронд үг хэлээр доромжлох хандлага гаргажээ. Түүгээр ч зогсохгүй “Энэ нэг халтайсан юмыг надаас холдуул даа” гэж хамгаалагчдаа дуудсан байна. Түүний дуудсан ёсоор бадируун биетэй хоёр залуу ирж үйлчлүүлэгч бүсгүйг хоёр талаас нь чирч гулдрах шахам гаргахыг завдаж. 

Нэгдүгээрт, үйлчилгээ муу байсан. Хоёрдугаарт, захирал хатагтайд доромжлуулсан. Гуравдугаарт, тус дэлгүүрээс хөөгдөхдөө тулсан үйлчүүлэгч бүсгүй энэ бүхэнд бухимдсан нь тодорхой. Тиймээс Э.Мөнгөнцэцэг хатагтайд хандаж ”Г.Сүхээ гуайн буянд чи их өөр болжээ. Чамайг хэн байсныг би сайн мэднэ шүү дээ” гэхэд захирал хатагтай улам уурлаж, түүний нүүрийг самардаад авсан байна. Үйлчлүүлэгч бүсгүй ч түүнд самардуулсандаа шоконд орж “Чи миний нүүрийг самардчихлаа шүү дээ” гэхэд Э.Мөнгөнцэцэг хатагтай ёстой л эзэн авхайн аашийг гаргаж, ойр орчмоо гайхуулаад авсан гэнэ. Хоёр бүсгүйг ийн маргаж, зодоондоо тулж байх хооронд Э.Мөнгөнцэцэгийн нөхөр, “Түшиг” компанийн захирал Г.Баттүшиг хүрч иржээ. Тэрбээр уурандаа дэлбэрэх шахсан эхнэрээ хориглох гэж хэчнээн оролдсон ч чадаагүй нь доорх бичлэгээс харагдана. Тэр бүү хэл Э.Мөнгөнцэцэг хатагтай нөхөртөө мэдэгдэхгүйгээр чихэнд нь ойртож “Есөн үеэрээ хоосон яваарай” гэж хэлжээ. Энэ үгнээс нь үйлчлүүлэгч бүсгүй нэлээд сэжиглэсэн байна. Дэлгүүрээр нь үйлчлүүлэх гэсэн биш эзэн авхайд нь нүүрээ уруулж, хэл үгээр доромжлуулсан бүсгүй хуулийн байгууллагад ханджээ. Э.Мөнгөнцэцэгийн яаж авирлаж байгаа талаарх бичлэгийг үйлчлүүлэгч бүсгүй утсаараа авч амжсан нь энэ юм.