Өчигдөр Америкийн эм үйлдвэрлэлийн Pfizer компани Covid-19 өвчний эсрэг бүтээсэн эмийнхээ туршилтын үр дүнг танилцуулжээ. Paxlovid нэрээр зах зээлд гарах эмийг туршилтад оролцсон эрсдэлтэй бүлгийн насанд хүрэгчдэд халдварын шинж тэмдэг илэрснээс нь хойш гурван хоногийн дотор уулгахад хүндрэл, эндэгдлийг 89 хувиар бууруулсан байна.

Pfizer компани одоо туршилтын үр дүнгээ АНУ-ын Хүнс, Эмийн хэрэг эрхлэх газарт илгээж, яаралтай горимд хэрэглэх зөвшөөрөл хүсэхээр төлөвлөж байгаа гэнэ.

Covid-19 өвчний эсрэг хоёр дахь эм бүтээгдсэн нь энэ юм. Эхний эмийг Merck компани бүтээсэн бөгөөд хүндрэл, эндэгдлийн эрсдэлийг тал орчим хувиар бууруулж байжээ.

Merck компанийн эмийг яаралтай горимд хэрэглэх зөвшөөрлийг Пүрэв гарагт Их Британийн засгийн газар олгосон юм. АНУ-ын Хүнс, Эмийн хэрэг эрхлэх газар арваннэгдүгээр сарын 30-нд уг эмийг зөвшөөрөх эсэх асуудлыг хэлэлцэхээр төлөвлөжээ.

Pfizer компани коронавирусийн халдвар авсан 1,219 хүнийг туршилтад оролцуулсан байна. Тэд бүгд ямар нэг суурь архаг хууч өвчтэй буюу эрсдэлтэй бүлгийнхэн байжээ.

Туршилтад оролцогчдыг санамсаргүй байдлаар хоёр бүлэгт хувааж, нэг бүлэгт нь шинэ эмийг уулгаж, нөгөө бүлэгт нь уулгаагүй  байна.

Эм уулгасан бүлгийн хүмүүсээс гурвынх нь бие хүндэрсэн бол ганц ч хүн нас бараагүй гэнэ. Харин нөгөө бүлгээс 27 хүн хүндээр өвчилж, долоо нь нас баржээ.

Pfizer-ийн эм нь коронавирусийг хүний биеийн эс дотор үржиж, өөрийгөө хувилахыг зогсоох үйлчилгээтэй юм байна.