"Орон нутгийн замд согтуу хүн машин жолоодож явна" гээд сэрэмжлүүлсэн тайлбартай бичлэг олон нийтийн цахим сүлжээнд цацагдаж байв.

Мэдээллийн мөрөөр шалгалтын ажиллагаа явуулсан тухай мэдээллээ.

Тээврийн Цагдаагийн Албанаас "2024 оны долдугаар сарын 23-ны өдөр нэр бүхий иргэний цахим хаягаас "Toyota Harrier" загварын машиныг согтуу хүн жолоодож явна. Та бүхэн болгоомжтой яваарай. Иймэрхүү хүмүүстэй тааралдаж байна шүү" гэсэн тайлбар бүхий бичлэг олон нийтийн сүлжээнд нийтлэгдсэн.

Уг мэдээллийн мөрөөр цагдаагийн байгууллагаас согтууруулах ундааны зүйл хэрэглэсэн үедээ тээврийн хэрэгсэл жолоодсон байж болзошгүй 52 настай иргэнийг олж тогтоон шалгалтын ажиллагаа явуулахад тухайн иргэн согтууруулах ундааны зүйл хэрэглэсэн үедээ тээврийн хэрэгсэл жолоодож, замын хөдөлгөөнд оролцсон гэдгээ хүлээн зөвшөөрсөн.

Зөрчлийг харьяаллын дагуу шилжүүлж, шалгалтын ажиллагаа үргэлжилж байна.

Согтууруулах ундааны зүйл хэрэглэсэн үедээ машин жолоодохгүй байх, жолоодуулахгүй байх, согтуугаар тээврийн хэрэгсэл жолоодож явахтай тааралдсан тохиолдолд нэн даруй цагдаагийн байгууллагад мэдэгдэж, зөрчлийг таслан зогсооход хамтран ажиллахыг зөвлөж байна" гэв.

Харин байршлаа зааж чадахгүй үед #WHAT3WORDS аппликэйшн ашиглахыг санууллаа.

Зөрчлийн тухай хуулиас:

Жолооч согтуурсан үедээ машин барьсан эхний удаад жолоодох эрхийг нэг жилээр хасаж, 400,000 төгрөгөөр торгоно. Эсвэл 7-30 хоног баривчлах шийтгэл оногдуулна. 

Эрүүгийн хуулиас:

Тээврийн хэрэгсэл жолоодох эрхээ хасуулсан, согтуурсан үедээ дахин машин барьсан, шалгуулахаас зайлсхийсэн бол 1-3 жилээр жолоодох эрхийг хасах, 2,700,000-14,000,000 хүртэл төгрөгөөр торгох, 240-720 цаг нийтэд тустай ажил хийлгэх, эсвэл 6 сараас 3 жилийн хугацаагаар зорчих эрхийг хязгаарлах, эсхүл 6 сараас 3 жилийн хорих ялаар шийтгэнэ.