Баянзүрх дүүргийн 24 дүгээр хороо, Эрдэнэтолгой орчмын авто замын эвдрэлийг нийслэлийн Засаг даргын нөөц хөрөнгөөр засварлахаар шийдвэрлэлээ. 

Энэ үеэр Хотын дарга Х.Нямбаатар "Да хүрээ захын нэгдүгээр эгнээнд машин зарж байгаа ченжүүдийн машиныг ачихгүй бол энэ зам хэдэн цагаар түгжрээд байна. Нийтийн эрх ашиг гэсэн зарчмаа л бодно шүү дээ. Гэтэл зөвхөн хувийн эрх ашгаа бодоод л зарах гэж байгаа машинуудаа Да хүрээ захын нүүрний эгнээнд зогсоогоод байна. Ченжүүдэд зөндөө сануулаад ойлгохгүй байгаа бол ачна" гэв. 

 Шархад буюу Эрдэнэтолгой гудамжны уулзвараас Газарчин дээд сургууль хүртэлх авто зам дагуу ус тогтож, авто замд эвдрэл үүсээд буй. Уг байршилд хотын Захирагч Х.Нямбаатар холбогдох албаныхантай ажиллав.

Дээрх авто замын засвар шинэчлэлтийн ажлын тендерийг зарласан бөгөөд гүйцэтгэгч компанийг наймдугаар сарын 30-нд шалгаруулна. Тиймээс Геодези, усны барилга байгууламжийн газар ОНӨААТҮГ-т авто замын засварын ажил эхлэхээс өмнө хөрсний усыг зайлуулах ажлыг засаг даргын нөөц хөрөнгөөр шуурхай хийх шаардлагатай. Мөн Авто плазагаас Хангай хотхон хүртэлх авто замын инженерийн шугам сүлжээний системийн зураг төслийг гарган дээрх ажилтай уялдуулан ажиллахыг хотын дарга Х.Нямбаатар үүрэг болгосон.