Оноо дүйцүүлэх хүсэлтийг энэ сарын 25-ныг хүртэл хүлээн авна

Монгол Улсын хэмжээнд их, дээд сургууль, коллежид элсэгчдийн мэдлэг, чадварын түвшин тогтоох элсэлтийн ерөнхий шалгалтыг  2022 оноос жилд хоёр удаа зохион байгуулж байна. Тодруулбал, 2024 оны өвлийн элсэлтийн шалгалт арванхоёрдугаар сарын 5-8-ны өдөр зохион байгуулагдах юм. Тэгвэл элсэлтийн ерөнхий шалгалт өгөхгүйгээр их, дээд сургуульд элсэх боломжийг олон улсын дүйцүүлэх шалгалт мөн  олгодог билээ. Өөрөөр хэлбэл, БШУЯ-ны сайдын 2024 оны хоёрдугаар сарын 16-ны өдрийн А/66 тоот тушаалаар батлагдсан “Элсэлтийн шалгалтын журам”-ын зургаадугаар бүлэгт заасны дагуу гадаадын улс орнуудад нийтлэг хүлээн зөвшөөрөгддөг олон улсын шалгалтын үнэлгээг Монгол Улсын их, дээд сургуульд оюутан элсүүлэх “Элсэлтийн шалгалт”-ын үнэлгээтэй дүйцүүлэхийг заажээ. Тэрхүү олон улсын шалгалтад Кембрижийн АS /advanced subsidiary/, A /advanced/, болон IB /international baccalaureate/ түвшний хөтөлбөр мөн IELTS /International English Language Testing System/, TOEFL /Test of English as a Foreign Language/, SAT /Scholastic Aptitude Test/ зэрэг нь багтах юм.

Их, дээд сургуулийн элсэлтийн шалгалт нь төгсөлтийн шалгалттай нэгдмэл зохион байгуулагддаг гадаадын ахлах сургууль төгссөн болон олон улсад хүлээн зөвшөөрөгдсөн бусад хөтөлбөрөөр суралцаж төгссөн оюутан, суралцагчдын сурлагын дүн, оноог дүйцүүлэх ажээ. Олон улсын шалгалтын үнэлгээг Монгол Улсын ЭШ-ын үнэлгээнд дүйцүүлэх хүсэлт, холбогдох бичиг баримтыг тухайн жилийн ЭШ эхлэхээс хамгийн багадаа ажлын 15 хоногийн өмнө “Боловсролын үнэлгээний төв”-ийн www.eec.mn сайтад орж “Элсэлтийн шалгалт” цэсээс  “Дүйцүүлэх”  сонголтыг хийж, ЭШ-д бүртгүүлсэн бүртгэлийн дугаар, нууц үгээ ашиглан системд нэвтэрч холбогдох мэдээлэл болон материалаа зааврын дагуу оруулан хүсэлтээ цахимаар ирүүлдэг. 2024 оны өвлийн элсэлтийн шалгалтад олон улсын шалгалтын дүн, оноо дүйцүүлэх хүсэлтийг арваннэгдүгээр сарын 25-ны 18:00 цаг хүртэл хүлээн авахыг “Боловсролын үнэлгээний төв”-өөс мэдэгдээд байна.

 

Дүйцүүлэх оноо нь гэрчилгээ авсан өдрөөс хойш хоёр жил хүчинтэй

 

Олон улсын шалгалтын үнэлгээг элсэлтийн шалгалтын үнэлгээнд дүйцүүлэх хүсэлт гаргаж буй оюутан, суралцагч нь ерөнхий боловсролын сургуулийг төгссөн эсвэл төгсөх ангид суралцаж буйг нотлох баримт бичигтэй байна. Олон улсын шалгалтад хамрагдаж, үнэлүүлсэн нь сертификатаар баталгаажуулна. Мөн энэхүү дүйцүүлсэн оноогоор зөвхөн Монгол Улсын дээд боловсролын сургалтын байгууллагад элсэн суралцах эрхтэй юм.

Олон улсад нийтлэг хүлээн зөвшөөрдөг шалгалтын үнэлгээг элсэлтийн шалгалтын хэмжээст оноонд дүйцүүлэх ажлыг Боловсролын үнэлгээ, арга зүйн байгууллага хариуцан гүйцэтгэнэ. Үнэлгээ дүйцүүлэх хүсэлт хүлээн авсан өдрөөс хойш ажлын 10 хоногт багтаан шийдвэрлэж, үнэлгээг дүйцүүлсэн “Батламж хуудас”-ыг цахимаар олгодог.

Олон улсын шалгалтад авсан үнэлгээг элсэлтийн шалгалтын үнэлгээтэй дүйцүүлэхдээ хэмжээст оноо /CEEB/, амжилтын чанарын индексээр тооцож гаргана. Тухайн жилийн хичээл тус бүрийн амжилтын чанарын индексийг тархалтын мужид шилжүүлэн тухайн харгалзах мужийн дээд хэмжээгээр нь тооцох юм. Элсэлтийн шалгалтын үнэлгээнд дүйцүүлэхдээ сүүлийн хоёр жилийн дотор олгогдсон олон улсын шалгалтын сертификат, дүнгийн хуудсыг үндэслэнэ. Мөн дүйцүүлсэн оноо нь олон улсын шалгалтад хамрагдаж, сертификат, гэрчилгээ авсан өдрөөс хойш хоёр жилийн хугацаанд хүчинтэй байна.

 

Шалгалтын оноог хэрхэн дүйцүүлж, тооцох вэ

 

Дээд боловсролын сургалтын байгууллагын элсэлтийн шалгалт нь бүрэн дунд боловсролын төгсөлтийн шалгалттай нэгдмэл авдаг гадаадын ахлах сургууль төгссөн болон энэ журмын 6.1-д зааснаас бусад олон улсад хүлээн зөвшөөрдөг шалгалтын үнэлгээтэй оюутан, суралцагчдын сурлагын дүн, оноог элсэлтийн шалгалтын дүн, оноонд дүйцүүлэхэд дараах зарчмыг баримтална.

Үүнд:

 

 

Элсэлтийн шалгалт	A	A-	B	B-	C	C-
Гүйцэтгэлийн хувиар дүйцүүлбэл	90-100%	80-89%	70-79%	60-69%	50-59%	40-49%

 

Элсэлтийн шалгалт	A	A-	B	B-	C
Тоон үзүүлэлтээр дүйцүүлбэл	5	4.5	4	3.5	3

 

 

Кембрижийн олон улсын шалгалт:

АS түвшин	a /90-100/	a /80-89/	b	c	d
Элсэлтийн шалгалт	A	A-	B	B-	C

 

А түвшин	А*	А	B	C	D
Элсэлтийн шалгалт	A	A	A-	B	B-

 

Олон улсын бакалавриат (IB) хөтөлбөрийн стандарт түвшин:

IB /SL-стандарт түвшин/	7	6	5	4
Элсэлтийн шалгалт	A-	B	B-	C

 

Олон улсын бакалавриат (IB)  хөтөлбөрийн ахисан түвшин:

 

IB /HL-ахисан түвшин/	7	6	5	4
Элсэлтийн шалгалт	A	А-	B	B-

 

TOEFL, IELTS болон PTE шалгалт /оноогоор/:

 

Элсэлтийн шалгалт	A	A-	B	B-	C	C-
TOEFL /IBT/	102-120	94-101	79-93	60-78	46-59	35-45
IELTS	7.5-9	7	6.5	6	5.5	5
PTE	76-89	66	56	46	36	29

 

SAT шалгалт:

 

Элсэлтийн шалгалт	A	A-	B	B-	C	C-
SAT	800	750	700	650	600	550

 

 

Эх сурвалж: “Зууны мэдээ” сонин