Өнөөдөр Шударга өрсөлдөөн, хэрэглэгчийн төлөө газар дээр тус төвийн дарга О.Магнай “Номин”, “Миний дэлгүүр”ийг нэг тэрбумаар торгосон тухай торгосон тухай мэдээлэл хийлээ.

О.Магнай энэ үеэр  “Тус байгууллагаас “Номин”, “Миний дэлгүүр” зэрэг томоохон сүлжээ дэлгүүрүүдэд шалгалтыг жилийн өмнө хийсэн. Шалгалтаар харилцагч бүрт ялгавартай ханддаг мөн янз бүрийн шимтгэл нэрийн доор бараа бүтээгдэхүүнээс хувь тооцож авдаг нь тогтоогдсон байгаа. Дээрх газруудад энэ зөрчлөө арилга гэдэг шаардлагыг хүргүүлсэн боловч өнөөдрийг хүртэл арилгаагүй. “Номин”, “Миний дэлгүүр” зэрэг сүлжээ дэлгүүрүүдийн нөхөд зах зээл дэх давамгай байдлаа ашиглан үндэсний үйлдвэрлэгчдэд томоохон дарамтыг бий болгож байна хэмээн үзэж байна. Энэ дагуу үнийг илүү тогтоож дундаас нь шимтгэл нэрээр ашиг олдог тогтолцоогоо өөрчил гэдэг шаардлага тавьсан ч харамсалтай нь өнөөдрийг хүртэл өөрчлөөгүй байна. Иймд “Номин” холдинг компанийг нэг тэрбум нэг зуун сая төгрөгөөр, “Миний дэлгүүр”-ийг 450 сая төгрөгөөр торгосон. Ингэж торгох болсон үндэслэлийг жишээгээр тайлбарлая. Юу гэвэл анх “SKY” гэдэг жүүсийг анх импортоор оруулж ирж байгаа нийлүүлэгч тал 1620 төгрөгөөр заръя гэж Миний дэлгүүрт өгсөн байгаа юм. Гэтэл “Миний дэлгүүр”-ийнхэн тус жүүснээс эхний ээлжинд шимтгэл гээд 3.5 хувийг нь аваад дээрээс нь нэмж жижиглэнгийн үнэ зохионо гэж 22.9 хувийг  нэмсэний үндсэн дээр 445 төгрөгийг нэмэгдүүлж 27.5 хувиар үнэ  өсгөсөн.

Үйлдвэрлэгч өрөө 3-5 хувийн ашиг, импортоор оруулж ирж байгаа компаниуд 10 хувийн ашгийн төлөө ажиллаж байхад  дээрх нөхдүүд давамгай байдал, сүлжээгээ ашиглан 20-30 хувийн ашиг олж байна. Эцсийн үр дүнд эндээс хэн хохирч байна гэхээр хэрэглэгчид иргэд хохирч байгаа юм" хэмээн онцоллоо.

Дээрх асуултай холбоотойгоор өнөөдөр 991120.. дугаараас ална гэж маш олон удаа сүрдүүлж утасдсан. Дөнгөж сая Миний дэлгүүр сүлжээний эзэн Ариунболд гэдэг нөхөр хэдэн нөхдүүд дагуулж орж ирээд ална гэж сүрдүүлсний дагуу би цагдаа дуудаж өглөө. Одоо эндээс гараад Чингэлтэй дүүргийн шүүхэд өргөдөл гаргаж өгнө. Үүнийг би зүгээр орхихгүй. Монгол Улс хуультай бол эдгээр хүмүүстэй хуулийн хүрээнд хариуцлага тооцдог байх ёстой” гэсэн юм.

Ийн мэдэгдсний дараахан ШӨХТГ-ын дарга О.Магнайг ална хэмээн сүрдүүлсэн “Миний дэлгүүр” сүлжээ компаний гүйцэтгэх захирал Х.Ариунболд сэтгүүлчдэд: “Сая та бүхэн О.Магнай даргын яриаг сонслоо. Энэ яриа бол ямар ч үндэслэлгүй. Ална тална гэсэн юм ерөөсөө байхгүй. Ямар ч үндэслэлгүй зүйл ярьж, олон нийтийн толгойг мэдээллийн хэрэгсэлээр эргүүлээд байна энэ хүн. Урд нь ярьж байсан олон асуудлууд бий.  О.Магнай бол ямар нэгэн юмны үзүүрээс барьж авсанаа олон нийтийн өмнө ажил хийсэн мэтээр ярьдаг хүн. Би О.Магнай даргад хэлсэн. Юу гэвэл, та ямарч үндэслэлгүй, шүүхийн тогтоол шийдвэргүйгээр ингэж зарлах буруу гэж хэлсэн байгаа. Яг үнэндээ Магнай бол дэлгүүрүүдийн бараа бүтээгдэхүүн ямар үнэтэй байдгийг мэдэхгүй хүн. Ургамлын тосыг л гэхэд бид бүхэн сүлжээ дэлгүүрүүдээрээ дамжуулан 2900 төгрөгөөр буюу хамгийн доод үнээр худалдаалдаг. Харин төрийн байууллагаас бид бүхнийг дэмжихийн оронд 450 сая төгрөгөөр торгоно  гэдгийг бол хүлээж авах боломжгүй. Зохих ёсны хуулийн байгууллагад хандана. О.Магнай бол амьдрал мэдэхгүй сенсаац хөөцөлдөж явдаг хүүхэлдэй” гэсан тайлбарыг өглөө.

Х.Даваа